Уреднички став: Непримерна смс комуникација на советничката на премиерот Елена Митева со новинарите на ИРЛ

Посебниот советник на премиерот за организирање на медиумски настани, Елена Митева, преку смс порака ja навреди новинарката на ИРЛ Маја Јовановска за денешниот текст во којшто тема на анализа беа спорните деловни етики на нејзиниот ангажман во Канцеларијата на Претседателот на Владата на Република Северна Македонија.

„Срамота. Се извадено од контекст. Ама важно имате приказна која нема никакви аргументи и не држи вода. Ептен сте истражувачки новинари. Секоја чест“, гласи пораката на Елена Митева до авторот на текстот Маја Јовановска.

На овој линк прочитајте ја сторијата за Елена Митева која што ги предизвика нејзините реакции.

Дење во владиниот пиар, навечер во приватниот маркетинг

По ова, одговорниот уредник ја упати Митева да испрати писмен демант во којшто ќе ги нареди фактите и доказите кои ќе ги демантираат фактите и доказите во нашиот текст. Но, таа не испрати никаков допис до редакцијата на ИРЛ.

Елена Митева треба да е свесна за големината и моќта на институцијата којашто ја претставува како лице со секојдневен пристап до премиерот и дека не смее да си дозволи комуникација којашто може погрешно да биде протолкувана како притисок. Таа не смее да се впушта во навреди и лични дисквалификации доколку не и’ се допаѓа она што е пишувано. Елена Митева како советник за организирање медиумски настани во политичка институција би требало да биде запознаена со деловната култура на комуникација помеѓу институциите и новинарите, како и со инструментите демант или жалба до Советот на етика. Повеќе информации може да добие од своите колеги во Кабинетот од кои што голем дел и соработуваа со еснафските организации во процесите на поттикнување на одговорност и транспарентност кај медиумите.

Ќе одговориме кусо и на пишувањата на социјалните мрежи од страна на роднини на советничката кои што ја напаѓаат организацијата и новинарката, конкретно актерот и поранешен директор на локалниот гостиварски театар Висар Вишка. Тој обвинува дека овој текст е се’ освен новинарски текст, или плод на “скриената омраза на некоја жена кон друга жена само заради тоа што е жена”, “обид да се спречи една самохрана мајка да заработи парче леб” од друга жена која што не знае како е да си самохрана мајка”, како и на подбивањата дека ИРЛ наместо да следеле криминал и корупција се бавеле со ниски удари кон неважни личности само заради тоа што се љубоморни”.

ИРЛ секогаш ја промовирало транспарентоста на својата уредувачка политика како еден од клучните приоритети во процесот на враќање на довербата на граѓаните во медиумите. Се надеваме дека аргументите подолу ќе придонесат за подобро разбирање на релевантноста на оваа тема за јавниот интерес.

Посебните советници по функција се најблиските соработници на Премиерот или министрите и котираат највисоко во хиеархијата на администрацијата. Мерит системот е еден од клучните критериуми за враќање на довербата во институциите и главен предуслов за да може да се случат вистински реформи и значајни политички промени. Ако мерит системот не се промовира во самите редови на партијата или институцијата, тогаш е невозможо да има било каков општествен напредок.

Авторката на текстот, Маја Јовановска, исто така самохрана мајка, заедно со своите колеги, веќе три години екстензивно известува за партиските злоупотреби во назначувањето на посебните советници и обидите за “ухлебување” на разни партиски колеги и лични пријатели и роднини на овие позиции, со што се придонесе и до девалвирање на институцијата посебен советник. Истата во некои минати времиња значеше ангажман на лице со посебни и докажани експертизи кое што ќе придонесе во спроведувањето на политиката и визијата на администрацијата.

ИРЛ со овој текст фрла светло и на други општествени појави, како злоупотреба на институциите, оти неспорно е дека Владата во овие две години ниту еднаш не се произнесе по прашањето која е конкретната цел и корист за земјата од ангажирањето на посебни советници за многу области. Во обид да ја илустрираме апсурдноста на позицијата “посебен советник за организирање на медиумски активности”, со неколку колеги направивме една иронична симулација за тоа како би изгледал еден советнички час меѓу претседателот на владата и односната советничка. Се консултиравме со четири големи маркетинг агенции и со три невладини организации со повеќе од 15 вработени кои имаат ваков кадар во својот персонал и редовно вршат вакви активности.

Советничката: „На настанот ќе служиме чај и кафе, а столчињата ќе бидат наредени во круг….и други техникалии од организациски карактер“. Премиерот: Одлично, а каде ќе стојат салфектите?”. Оваа илустрација не ја користиме за да ја навредиме Елена Митева лично или нејзините вештини, само за да укажеме дека за истата позиција не се побарува специјална експертиза дотолку, што премиерот мора да бара и посебен советник. Тоа не значи дека неговиот кабинет не треба да има вакво кадар, напротив, оваа работа побарува добри менаџери и организирани и вешти луѓе. Но, на овој тип професионалци местото им е во други институции и на други позиции.

Елена Митева не е жртва на никаков личен прогон од страна на новинарите на ИРЛ. Таа е жртва на сопственото незнаење дека во информативните програми и изданија на медиумите веќе три години се крева прашина за именувањето на посебните советници и дека се води јавна дебата за бројот и потребата на лица ангажирани на пиар активности во институциите. Таа е жртва на својата неподготвеност да процени дека нејзината позиција во најмоќната канцеларија ќе и донесе видливост на каква што можеби и не е подготвена.

Неспорен е фактот дека Митева на позицијата доаѓа како партиски предлог, а за истата никогаш не бил објавен оглас. Неспорно е дека оваа работа отвора можности за контакти кои на обичните смртници не им се достапни и кои што можат да ги подобрат нејзините перспективи за кариера. Неспорно е и дека ја има привилегијата и се надеваме и честа да им служи на граѓаните на институцијата Канцеларија на Претседателот на Владата на Република Северна Македонија.

Неспорна е конзистентноста на ИРЛ во системското и повеќе годишно следење на прекршувањата на начелата на заслуги во администрацијата, што влегува во областа владеење на правото којашто ние ја следиме. Сме пишувале за повеќето колеги на Елена Митева, но никој не не’ обвинил за личен прогон, ниту пак, не навредувал по пораки. ИРЛ не ја истражува Елена Митева, ИРЛ го истражува и следи феноменот. Во продолжение погледнете ги и другите наши написи од 2018 година до денеска кои што ја опфаќаат оваа тема.

Пишува: Сашка Цветковска, одговорен уредник