Сите знаеме кој е Нефи Усеини, но дали знаеме што е Нефи Усеини
Автор: Сашка Цветковска; Камера: Трајче Антоновски и Давид Илиески; Монтажа: Давид Илиески
Нефи Усеини не е обичен човек. Тој може да прави кривични дела без да ги издржи затворските казни. Може да учествува во борби со кучиња и видеата од нив да ги објавува на социјалните мрежи без да се плаши дека ќе го побара полиција. Во Нефи и неговите постапки, судската, извршната и законодавната власт не гледаат проблем. Со нивна помош тој останува над законот.
Партии, пратеници, советници и градоначалници од оваа владејачка гарнитура, но и од претходните не гледаат ништо проблематично во неговото однесување.
Немаат проблем да прифатат човек со проблематично и, често насилничко однесување да тргува со гласови во нивна полза.
Исламската верска заедница, па и турската влада со него се и во деловни односи. Нефи Усеини денеска е советник и има моќ да одлучува за најголемото културно и природно богатсво.
Од 90-тите па наваму, заробениот систем е одржуван (помалку или повеќе) од сите политички партии.
Оваа приказна не портретира само еден обичен злосторник, туку и гнилиот систем кој се изгради за да стане прифатено бруталното кршење на законите.
Истражувачката репортерска лабораторија го започнува серијалот „Локални шерифи“ чија што цел е преку истражување на локалните проблеми да ги покажеме апсурдите на кои што е сведен системот кој што од независноста до денес почива на широко распространета и длабоко пенетрирана корупција.
Погледнете го првото видео на ИРЛ од серијалот за „Локалните шерифи“.
