Пишуваат: Маја Јовановска и Александра Денковска Гоцевска
Обновено
Владата на денешната седница донесе одлука за намалување за еден час на забраната на движење на населението. Наместо како досега од 21 до 6 часот, полицискиот час ќе трае од 21 до 5. Ограничувањето на движењето до 6 часот особено создаде проблеми во Скопје, бидејќи голем дел од граѓаните користат јавен превоз, па во утринските часови во автобусите имаше големи гужви. Градоначалникот на Скопје, Петре Шилегов, за одлуката на Владата соопшти на неговиот Фејзбук профил.
„Од утре, автобускиот превоз ќе се одвива од 05 часот наутро (како и до пред денешниот ден), за секој навремено и без гужви да стаса до својата дестинација. Ова, секако не значи дека било кој од нас треба да се опушти во чувањето на сопственото и јавното здравје и да се придржува кон препораките на надлежните. Ве замолувам, кој нема неопходни и неодложни обврски, да останете дома“ – напиша Шилегов.
Во продолжение прочитајте како беше денеска во Скопје, по првиот полициски час
Понеделник, прв работен ден по воведување на полицискиот час. Заврши утрово во 6 часот, кога граѓаните можеа да излезат од домовите. Полицискиот час и вонредните мерки на најголем дел од луѓето им го смени секојдневието. Учениците и студентите се дома, се затворија сите угостителски објекти, трговски центри и многу други услужни дејности. Голем дел од граѓаните ја „пренесоа работата дома’, но има и такви кои мора да одат на работа. Освен вработените во здравството, полицијата, војската, пожарната служба, тоа се и вработените во продавниците за храна, аптеките, како и фабриките, каде процесот на производство не запира.
„Секое утро морам да сменам два автобуса за да стигнам на работа. Живеам во Пинтија, работното место ми е во погон во Влае. Ние, приватниот сектор, одиме на работа и за нас кои патуваме со автобус правилата за заштита е невозможно да се почитуваат. Неподносливо беше да се издржат турканиците во нормални услови, но сега не само што се уште поголеми, туку сега автобусите се темпирана бомба за ширење на короната“, вели за ИРЛ Валентина С. Од Скопје.
Валентина, но и многу други граѓани кои до работните места патуваат со автобус, се исплашени дека градскиот превоз може дас стане жариште за пренесување на вирусот во главниот град. Најголем дел од луѓето кои во моментов го користат градскиот превоз, потоа одат во индустриските капацитети каде работат стотици, па и илјадници луѓе.
Во саботата, кога Владата реши да прогласи воведување на полициски час, премиерот Оливер Спасовски како една од мерките која ќе биде преземени рече дека ќе биде намален број на патници во градскиот и меѓуградскиот превоз.
„Да се организира меѓуградскиот и јавниот превоз со ограничување на капацитетот за превоз на патници за 50% во возилото, или со задолжително одржување на растојание од најмалку два метри меѓу патниците“, рече Спасовски.
Но, воведувањето на полициски час предизвика и поместување на возниот ред на автобусите во Скопје. Наместо како претходно од 5 часот наутро до полноќ, поради забраната за движење на населението, градските автобуси почнуваат со работа во 6 часот. Последните линии тргнуваат најдоцна до 20.20 минути за да завршат пред 21 часот кога почнува полицискиот час. Тоа практично значи дека граѓаните кои оделе на работа пред 6 часот, сега ќе мораат да го чекаат првиот автобус кој поаѓа по завршување на полицискиот час. И тогаш, во периодот од 6 часот до 7.30 е најголемиот метеж во автобусите. И не само што се намали работното време во ЈСП, туку од завчера се вози по саботен ред, односно со редуцирани линии.
„Не ми е јасно зошто ЈСП не го адаптира возниот ред на новонастанатите околности. Утрово бев принудена да се симнам од автобусот и да одам 3 км пеш до работа, за да стигнам на работа и да ги избегнам турканиците“, вели нашата соговорничка Валентина од Скопје.
На социјалните мрежи се појавија фотографии од автобуска постојка, од автобус со број 22, во кој нема место за сите граѓани. Дел од нив се со маски, дел не носат ни ракавици, ниту никаква заштита.
На прашање на ИРЛ од ЈСП Скопје велат дека компанијата не одлучува самостојно за начинот како да се организира јавниот превоз во актуелнава ситуација, односно превозот функционира согласно одлуките и препораките на надлежните институции во борбата за превенција од ширење на коронавирусот.
„Веќе неколку дена автобусите сообраќаат по саботен возен ред, односно возниот ред е редуциран од вообичаениот, со оглед на значително намалениот број на патници кој се должи на укинување на наставниот процес (укинатите бесплатни средношколски и студентски билети, како и укинатиот бесплатен превоз за возрасни лица во вторник, петок, сабота и недела), како и апелите за рационално користење на превозот. Исклучок се неколку линии, за кои ситуацијата на терен наложи возниот ред да не се редуцира“, соопштија од ЈСП Скопје.
Оттаму велат дека постојано се следи ситуацијата на терен, во координација со другите институции кои одлучуваат за препораките како да се реагира во новонастаната ситуација.
Градоначалникот на Скопје, Петре Шилегов, на прашање на ИРЛ дали се размислува за укинување на градскиот превоз кусо одговори.
„Денеска е прв работен ден и кај нас сега стигаат податоците, ги анализираме. Утре, максимум задутре очекувам да имаме избалансиран јавен превоз’, ни изјави Шилегов.
Од ЈСП Скопје попладнево решија да вратат одредени линии, односно како што велат појачување во утринските часови кај првите поаѓања.
„Од утре, вторник (24.03.2020 год), на линиите 2, 5, 11, 22, 57, 61, 62, 63 и 67, во утринските часови ќе сообраќаат зголемен број на возила, со цел да се избегнат гужвите кои беа регистрирани утринава во фрекфентните часови“, соопштија од ЈСП Скопје.
Вкупната бројка на дијагностицирани пациенти со КОВИД-19 денеска до 12.00 часот, изнесува 136, од кои 1 излекуван и 2 починати пациенти.
Според местото на живеење, најмногу има во Скопје – 81 случај, од кои 25 се хоспитализирани, а останатите се на домашно лекување.
По Скопје, најмногу пациенти има во Дебар (40) – од кои 1 починат, потоа во Штип (7), Куманово (3) – од кои 1 починат, Кавадарци (2), Охрид (2) – од кои 1 лице е од Скопје, а е во иозлација во Охрид и Гостивар (1).
