Press "Enter" to skip to content

(ВИДЕО) Како Филипче ги демотивираше младите во 50 секунди

31.03.2020

Идејата за средба со граѓанските организации и претставници на владиниот кабинет е со цел власта да купи добри идеи и издржани предлози од младите и да ги чуе нивните потреби. Наместо тоа, видовме про-форма средба на која што владините преставници дури и ги демотивираа младите со добри идеи кои што дополнително треба да го подобрат животот на сите граѓани.

Владата реши да ги слушне идеите на граѓанските организации, со цел добрите проекти да ги реализира. Една од невладините е и „Културно ехо“ чии претставници го презентираа нивниот проект, во којшто тие предлагаат напуштените објекти и стари фабрики во сопственост на државата да станат младински и студентски јадра по примерот на европските градови.

Старата фабрика „Купром“ во Скопје е едно такво место. На министерот Филипче сериозно и детално му беше објаснето овој руиниран објект може да се оживее за малку пари, наместо да се градат згради. Филипче им рече дека тие имаат подобар план. Ќе граделе некаква „форма на студентски град“ во новиот клинички центар. Ќе имало и културно-забавен живот, а идејата на „Културно ехо“ веќе била вклопена во проектот на Владата.

Културно ехо

„Културно Ехо“ е група на млади визионери кои се борат за зачувување на културното наследство. Нивната визија за објектот кој полека но сигурно заминува во заборав, беше образложена преку пет минутна презентација за отворен студентски град според западно европските примери.

На оваа локација веќе има издадено маркица од општината Ѓорче Петров за изградба на станбени згради, а „Културно Ехо“ апелира стариот објект кој е од културно-индустриско значење за градот да не биде урнат.

Нивната визија дава надеж и инспирација на младите и ги инкорпорира сите сегменти од младинскиот живот кој им се моментално ускратени на младите, а очајнички потребни и неопходни. Тие предвидуваат во овој простор да се одвиваат културно-едукативни содржини, да има простории за работилници со производствени машини и оддел за занаетчии, предавални и читални, соби за престој на млади од други градови како и концертна сала за различни видови настани.

Видеото кое тие го постираа образложувајќи ја нивната замисла, не може да остави ниеден млад човек рамнодушен. Како одговор на нивната упорност, храброст и визионерство, министерот за здравство Венко Филипче им даде краток и демотивирачки одговор, фрлајќи го во вода нивниот долгогодишен труд. Тој наместо да даде конструктивен одговор и да покаже иницијатива за нивниот проект, кратко ја образложи својата замисла за студентски град во рамки на новиот клинички центар во Ѓорче Петров. Или во превод, им рече: „Супер, видовме, браво дечки, ама ние сме тие што знаеме како треба“.

https://www.facebook.com/culturalechoes/videos/1324780257685576/

 

Симона Димковска од „Културно Ехо“ за ИРЛ вели дека очекуваат да се оствари средбата со министерот, но смета дека се работи за два различни проекти, со заеднички карактеристики.

Сметам дека за студентите по медицина е повеќе од потребен таков простор, и се надевам дека ќе дојде до реализација на оваа идеја. Сепак идејата за Купром е нешто што го поддржуваат илјадници млади луѓе, уметници и изведувачи од целата држава, а студентски град во склоп на клинички центар може да биде ограничувачки фактор,“ објасни таа.

Надмена влада, просечни идеи

Одговорот на министерот за здравство беше потполно неадекватен, па дури и до негде неповрзан. Додека тие зборуваат за студентски град и нов културен центар во Скопје кој ќе ги обедини младите и активно ќе учестувува во нивниот развој, во нивното професионално и културно издигнување, министерот занемарувајќи се’ што тие кажале, им ја презентираше својата идеја и замисла за „форма на студентски град“ кој ќе егзистира во рамките на новиот клинички центар, а според неговото кратко и неконцизно објаснување може да разбереме дека тој опишува еден просечен студентски дом.

Според одговорот на министерот за здравство, се чини дека самата иницијатива од страната на Владата која во нормални околности би требала да биде за поздравување, е само мачкање очи. Но дали е ова победа за граѓанскиот сектор и активистите или само уште една популистичка мерка со која се симулира и лажира отвореност за размена на идеи?

Претседателката на МОФ, Стефани Спировска за ИРЛ истакна дека е загрижена од односот на институциите кон конструктивните предлози кои ги даваат младите.

Честопати предлозите од младите, младинските здруженија и организации остануваат само на записници од консултативни средби. Ова не само што остава често да пропаднат добри идеи и предлози, туку и ги обесхрабрува младите активно да учествуваат во креирање на можни решенија за нив,“ објаснува Стефани.

Таа потенцира дека е важно да се користат капацитетите и предлозите кои младинските организации ги имаат и градат.

Па така, не смееме да се доведуваме во ситуација во која ќе се вложат ресурси во градење на нов студентски дом кога бројни се они кои пропаѓаат и незначително се унапредуваат, а за сметка на тоа да се отфрлат квалитетни предлози за простори кои се повеќе од потребни за младите во нашиот град,“ додава Спировска.

Иницијативата на „Културно Ехо“ е многу повеќе од зграда со соби за престој и една просторија за диско како во останатите студентски домови. Тие имаат визија за слободен простор за младите каде како што тие велат, урбаната култура и неформалното образование ќе претставуваат сврзно ткиво кое ќе ги унапреди односите помеѓу сите етнички заедници. Нивниот проект потсетува на амбициозното ветување кое СДСМ го имаше во својата предизборна кампања „За живот во Македонија“, за студентски град по сите европски стандарди. Но две години поминаа, а животот за младите не дојде.

Проектот на „Културно Ехо“ евидентно е изработен со многу труд, иновативност и креативност. Тие на Владата практично и нудат готов проект базиран на исцрпно истражување за значењето на фабриката како културно-индсустриско наследство и за потребите на младите кои можат да бидат задоволени преку активностите што тие ги предлагаат.

Коментар на авторот