Сватовската врска меѓу судијката Благица Ѓошевска и адвокатот на „Фероинвест“, Ратко Ѓорѓиевски доведе до откажување на денешната пресуда во случајот каде фирмата-ќерка на „Фероинвест“, ЕМС, го тужи Министерството за здравство за неисплатени три модуларни амбуланти. Од друга страна министерството бара договорот да се прогласи за ништовен бидејќи по пожарот во Тетово склучиле незаконски анекс со којшто сумата се зголемила. Основниот суд Скопје 2 ќе одлучува дали предметот ќе го врати од почеток.
Известува: Лила Караташева
Во конкретниот судски процес компанијата „ЕМС“, фирма-ќерка на „Фероинвест“, бара да ѝ се исплатат 1,2 милиони евра за изградени три модуларни амбуланти, додека пак, министерството бара да се поништи договорот, бидејќи по пожарот во модуларната болница во Тетово бил потпишан незаконски анекс за да се подобрат безбедносните стандари на објектите, а со тоа се зголемила и сумата.
Овој предмет преку судскиот систем бил распределен кај судијката Благица Ѓошевска, која е во роднинска врска, односно тетка на Мери Младеновска – Ѓорѓиевска правен застапник на „Фероинвест“ во повеќе судски спорови и сопруга на Ратко Ѓорѓиевски, адвокат во конкретниот предмет каде „Фероинвест“ го тужи Министерството за здравство.
За оваа роднинска врска до денот на пресудата не реагирала ниту судијката, ниту адвокатот, ниту пак државниот правобранител кој ги застапува интересите на државата, во случајов на Министерството за здравство.
Ратко Ѓорѓиевски освен што е правен застапник на „Фероинвест“, тој беше поставен и на позицијата управител во периодот кога Кочо Анѓушев беше вицепремиер за економски прашања во Владата на Зоран Заев.
ИРЛ ги контактираше сопружниците адвокати за да ја провериме информацијата за нивната роднинска врска со судијката. Во краткиот телефонски разговор со Мери Младеновска – Ѓорѓиевска рече дека не сака да зборува за предмети кои таа лично не ги води и одби да одговори дали судијката Ѓошевска е прва братучетка на нејзиниот татко.
Сопругот адвокат, Ратко Ѓорѓиевски на прашањето дали судијката е тетка на неговата сопруга, а со тоа тој е во сватовска врска со неа категорично одговори „Не“.
Новинар на ИРЛ денеска беше присутен во Основниот граѓански суд каде требаше да се прочита пресудата. Откако судијката Благица Ѓошевска им соопшти на присутните дека пресуда нема да има и дека ќе се чека судот да одлучи дали ќе го врати предметот на почеток со друг судија, новинарот ѝ пристапи и ја праша дали е точно дека е во роднинска врска со адвокатот Ѓорѓиевски, на што таа одговори потврдно.
„Точно е дека Мери Младеновска-Ѓорѓиевска ми е внука. Но, јас сметав дека нема судир на интереси бидејќи внука како роднинска врска се смета за четврти – петти степен. Сум имала друг судски предмет каде што сум имала роднинска врска и таму на мое барање е направено изземање. Тука сметам дека не е таков случајот, но да видиме што ќе одлучи судот“, одговори судијката Ѓошевска.
ИРЛ на 31 октомври испрати прашања и до Државното правобранителство дали знаеле или дали утврдиле во текот на постапката дека судијката има роднинска врска со адвокатот. Оттаму ни одговорија дека Државното правобранителство не можело да знае за роднински врски, туку според Законот за парнична постапка тоа требало да го пријави самата судијка.
„Веднаш по приемот на вашите прашања, надлежниот државен правобранител до Претседателот на Основниот граѓански суд во Скопје поднел барање за изземање на судијата по електронски пат, а на ден 3 ноември 2023 година барањето го доставил до приемното одделение во Основниот граѓански суд во Скопје“, велат од Државното правобранителство.
Од Основниот граѓански суд каде што се суди овој предмет ни одговорија дека судијката не пријавила судир на интереси.
„Наведениот судија не го известил судот за постоење на конфликт на интереси во наведениот предмет, како и дека за секој предмет поединечно судиите треба да ги имаат во предвид одредбите од член 64 од Законот за парнична постапка, при постапувањето по истите“, се вели во одговорот од Судот.
Посочениот член од Законот за парнична постапка предвидува дека судија или судија-поротник не може да ја врши судската должност ако странката или законскиот застапник или полномошникот на странката му е роднина по крв во права линија до кој и да е степен, а во странична линија до четврти степен, или му е брачен другар, вонбрачен другар или роднина по сватовство до втори степен, без оглед дали бракот престанал или не.
Проектот за изградба на модуларни болници почна во мандатот на министерот Венко Филипче, кога беа изградени 19 ковид болници низ цела Македонија. А, потоа со истата техничка документација и истите услови се распиша тендер за изградба на десет модуларни амбуланти во Скопје. Двата тендери ги добија фирми на господинот Кочо Анѓушев. Во двете постапки претседател на комисијата за јавни набавки беше Вања Андонова.
Кога се случи пожарот во модуларната болница во Тетово на 8 – ми септември 2021 година, во завршна фаза беа три амбуланти во Скопје. Документите кои ИРЛ ги објави во документарниот филм „Убиство во Тетово“ покажаа дека објектите не нудат минимални безбедносни стандарди од пожари и целиот проект по трагедијата е стопиран. Постои и допис од фирмата изведувач „ЕМС“ до Министерството за здравство испратен една недела по пожарот во кој самоиницијативно бара да се подобрат стандардите за заштита од пожари. Министерот Филипче одобрува дополнителен буџет и незаконски склучува Анекс на договорот со кој се зголемува цената и се пролонгира рокот за изградба на објектите.
Наследникот на Филипче, Беким Сали, спроведува интерна истрага која треба да даде одговори дали тендерската постапка за замена на старите скопски амбуланти била спроведена законски и дали при изградбата биле запазени сите безбедносни стандарди.
Изготвен е ревизорски извештај во кој се утврдени сериозни пропусти во проектот за амбулантите, а директна одговорност се лоцира во дејствијата на министерот Филипче, неговата советничка Вања Андонова и изведувачот „Енерџи Меинтененс Солушнс“. Министерот Сали не ги исплаќа фактурите, ниту го раскинува договорот. Овој проблем го наследува актуелниот министер Фатмир Меџити.
На 13 јули годинава Меџити изјави дека имал средба со претставници на компанијата „Брако“ на која се договориле спогодбено да ги исплатат парите.
„Тоа е веќе судски процес и имаше многу камати. Седнавме со сопствениците од компанијата, се договоривме да ги тргнат каматите, спогодбено да се исплати тој износ, тоа што имаат изградено, тоа што е во ред, а за другото да се тргнат од тоа што го бараат. Тоа го поминавме на Влада, како информација и за тоа добивме поддршка“, изјави тогаш Меџити.
Но, по објавата на истражувањето „Убиство во Тетово“ владата ја смени одлуката и реши да завршат сите судски постапки.
„Претходниот министер има нарачано ревизија и таа е доставена до Владата заедно со документите кои што се однесуваат на неплатените модуларни болници и сметам дека врз основа на сите тие документи и Владата ќе одлучи. Мој став е дека врз основа на сите документи за плаќањето на останатите ќе може да биде извршено кога ќе завршат сите правосудни постапки“, изјави на 17 август премиерот Димитар Ковачевски.
На последното рочиште државната правобранителка на прашање на судијката дали се водат други постапки за модуларните амбуланти одговори дека нема такви информации. За модуларните амбуланти кои ги градеше „Брако“ има предистрага која ја води Јавното обвинителство за борба против организиран криминал и корупција. Отворена е веднаш по пожарот, во септември 2021 година, и се уште е во фаза на предистрага.
За пожарот во Тетово донесена е првостепена пресуда за непочитување на здравствени протоколи и загрозување на животот на пациентите со која беа осудени условно двајцата поранешни директори на болницата во Тетово. Обвинителството поднесе жалба до Апелациониот суд во Гостивар кој треба да закаже јавна седница.
Доколку не сте го гледале документарниот филм „Убиство во Тетово“, го споделуваме на линкот подолу
