Press "Enter" to skip to content

Повеќе од 200 милиони долари генерираат веб страниците креирани за дезинформации

25.11.2019

Милиони долари од некои од најголемите светски компании завршуваат кај луѓе чии веб страни се креирани со цел да ја доведат во заблуда јавноста и да шират дезинформации. Над 20.000 веб-сајтови, кои претставуваат ризик за дезинформација генерираат околу 235 милиони американски долари годишно, покажува студијата објавена минатиот месец од Глобалниот индекс за дезинформации (ГДИ) од Лондон, пренесе „Дојче Веле“, објави ССНМ.

Така на пример, на сајтови како „Твитичи“ и „Нулта Хеџ“, завршиле реклами на поголеми германски компании од типот на железничкиот оператор Дојче Бан, производителот на автомобили „Опел“, „Дојче Телеком“ и „Постбанк“.  А овие две-веб страници важат за извори на дезинформација.

Дигиталното рекламирање е управувано од употреба на софтвер за купување и продажба на рекламен простор преку Интернет или техника позната како „програмско рекламирање“. Тоа опфаќа две третини од трошењето за дигитално рекламирање (76 милијарди евра) во 2019 година, а се предвидува дека сумата ќе биде повисока во 2020 година.

Компаниите честопати одбираат размена на реклами како Гугл, Апнеукс или Амазон, за рекламирање преку интернет. Размената на реклами дејствува како посредници меѓу брендовите и издравачите, потпирајќи се на софистициран софтер за купување и продажба на милијарди импресии, честопати во реално време. Сепак, на еко системот му недостасува транспарентност, при што набљудувачите во индустријата ова го опишуваат како „Див див Запад“.

Во јуни, регулаторот за заштита на личните податоци во Обединетото Кралство ја истакна главната загриженост во индустријата, велејќи дека треба да се направат измени за да се обезбеди усогласеност со регулативата, вклучително и регулативата за заштита на податоци на ЕУ.

„Многу луѓе нема да мислат ниту еден момент за сложениот процес што води до реклами што се појавуваат на веб-страниците и апликациите што ги користат, но зад сцената е сложен и голем систем“, изјави британската комесарка за информации, Елизабет Денхам.

Регулатива

Во германскиот владин извештај во јуни се вели дека деловните модели како што е програмското рекламирање се „проблематични“ и „не треба да се остават нерегулирани“.

Во извештајот се вели дека автоматското поставување на реклами како што е на пример програмското рекламирање, може дополнително да го забрза размножувањето на дезинформации во тандем со социјалните мрежи и останати мрежи со висок ризик. Ваквиот проток на дезинформација може да имаат значителни политички, социјални и економски последици.

Германија ги водеше напорите за борба против нелегалната содржина преку интернет, како што се говорот на омраза и поттикнувањето на насилство. Како и да е, правните пристапи за борба против дезинформациите остануваат предмет на контроверзи заради загриженоста за слобода на изразување. Владиниот извештај сугерираше понатамошна дискусија за тоа дали операторите на платформи, вклучително и размената на реклами, треба да бидат одговорни во рамките на регулаторната рамка.

Но, не секој верува дека ова решение е соодветен одговор на проблемот. Директорот на програмата на ГДИ, Крег Фаган, за Дојче Веле изјави дека само пристапот преку крос-платформа ќе биде доволен за да се намалат дезинформациите и нивното финансирање преку приходите од реклами.

„Навистина процесот треба да се води од индустријата во моментов, за да може да се реши проблемот“, вели Фаган.

Фаган нагласува дека се работи за долгогодишен проблем, за кој потребно е решение од целата индустрија.