Спорната изградба на четири згради во Пржино вчера беше причина за уривање на потпорен ѕид. Градбата моментално е стопирана, но ќе продолжи веднаш штом инвеститорите го санираат ѕидот и го обезбедат објектот. Жителите на околните куќи се жалат дека неколку пати испратиле писма до општината, со предупредување дека потпорниот ѕид може да падне и куќите од горната уличка да се слизнат надоле, но досега не добиле никаков одговор од општинарите. Се надеваат дека по овој инцидент градежните инспектори ќе се вразумат и засекогаш ќе ја стопираат оваа градба.
Инвеститорот на четирите станбени згради во Пржино доби привремена забрана за работа откако синоќа на неговото градилиште се урна потпорен ѕид. Градежен инспектор од општината Кисела Вода по денешниот увид му соопшти на сопственикот дека мора прво да го обезбеди градилиштето, а потоа да продолжи со градежните работи.
„Секторот за инспекциски работи на Општина Кисела Вода, на терен врши увид, по што, ќе биде изготвен записник и решение. Во моментов, укажано е да се сопрат сите други градежни активности, освен заштита на градежната јама“, изјавија за ИРЛ од општина Кисела Вода.
Вчера околу 18 часот околните жители слушнале силен татнеж и помислиле дека е земјотрес. Но, кога излегле на улица виделе дека дел од ѕидот, греди и земја се урнале низ градилиштето. За среќа во тој момент немало ниту еден работник, а не е оштетена ниту некоја од соседните куќи. Тензичната атмосфера на слепата уличка се повеќе расте. Жителите велат дека нивната мирна околина се претворила во театар за јавноста, додека поддршката од институциите се уште не стасала во Пржино.
Револтираните жители со висок тон и се обратија на градежната инспекторка која вршеше увид на терен.
„Замислете да живеевте тука и од еднаш да осетите како паѓа потпорен ѕид, како Вие ќе се чувствувате? Знаеме одобренијата за градба во оваа држава како се даваат“.
Градежната инспекторка при заминувањето од улицата Пржино на жителите им кажа дека не е нејзина ингеренција да им објаснува на градежниците и инвеститорите како да работат.
Првите соседи и жители од улицата „Пржино“ се исплашени за нивната безбедност, бидејќи постои опасност земјиштето да се одрони кон нивните куќи.
„Вчера околу 18:00 часот почувствувавме голем потрес дома, исто како земјотресот во Маврово. Голема бука додека паѓаа лимовите и потпорниот ѕид. Кога излеговме имаше прашина, почнаа да излегуваат и соседите бидејќи се почувствувало до долниот дел на улицата. За среќа нема никакви човечки жртви, ниту повредени. Му се јавивме на градоначалникот, не прати никој. Полиција дојде после два часа, исто така и инвеститорот. Дојдоа луѓе кои се обидоа нешто да санираат и да го оградат просторот кој претходно не беше ограден и можеше било кој да помине од таму и да се најде на лице место додека паѓа ѕидот“, вели Ацо Антевски – жител на Пржино.
Жителите на Пржино велат дека до скоро немале проблеми со вакви големи објекти кои го нарушуваат струењето на воздухот и дека се чувствуваат немоќно пред ваквото нехумано однесување на поединци.
„Ние како граѓани ги исполнуваме сите граѓански обврски, никогаш никој од оваа улица не му направил некаков проблем на општеството. Во оваа ситуација кога институциите треба да застанат и да си речат овие граѓани имаат мака, никој не се појавува. Тоа е нашата најголема болка. Ние ќе имаме проблеми и со фекалната канализација. Не знам ни кои се тие инжинери кои можат да стават потпис на нешто вакво. Штета е што никој освен ние тука што живееме, не застана да го заштити Пржино“, вели Љупка Владичевска – жител на Пржино.
Атанас Исајловски е еден од инвеститорите и сопственик на фирмата „Топ метал“, од утрово беше на градилиштето. Тој вели дека станува збор за падната греда што предизвикала пад на ѕид кој постои уште од 60тите години. Според него падот на ѕидот не можел да го предвидат ни надзорот и изведувачот, ниту пак некој друг.
„Ѕидот падна надоле во 18:00 часот кога немаше никој. Нема некоја голема штета, ќе го направиме како што треба. Ќе ја направиме и горната улица иако тоа не е наша обврска. Утре ќе дојдат екипи да го средат ова и ќе се направи нов ѕид и столб од 1 метар, доле ќе се копа 2 метри и никогаш веќе нема да има проблем“, рече Исајловски.
Драган Милановски, кој живее во близина на паднатиот ѕид и работи како надзор на други градежни објекти вели дека на изградбата на зградите не работат доволно стручни лица и дека очигледно инвеститорот е економист, а не градежник. Како стручен во оваа област, Милановски му се обратил и на градоначалникот на Кисела Вода, Филип Темелковски кој пред два дена бил во посета на објектот.
„Му реков: Градоначалнику, постои опасност ѕидот на падне. Тој ме слушна и си отиде, следниот ден ѕидот навистина падна. Исто така вчера испратив писмо до градежниот општински инспектор во 10 часот утрото, со истата порака дека ѕидот ќе падне. Повратен одговор не добив ни од таму“, вели Милановски.
ИРЛ веќе неколку месеци известува за малата и неатрактивна приказна за другите медиуми и за осамената борба на жителите на улицата „Пржино“, а дури пред неколку дена доби интерес од јавноста откако известивме дека жителите со жив штит ја бранат својата улица и своите домови.
Деталниот урбанистички план за оваа четврт е донесен на 31 мај 2016 година во време на мандатот на претходната градоначалничка Билјана Беличанец и кога во Советот мнозинство имаше ВМРО-ДПМНЕ. Како што објави ИРЛ, за ДУП-от гласале сите советници и од ВМРО-ДПМНЕ и од СДСМ и е донесен едногласно. Во тој мандат советничка во Кисела Вода е и Мери Проја Продановска, сопруга на еден од инвеститорите на спорниот станбен комплекс – Љупчо Продановски. Продановски е кадар на СДСМ и од 2018 има моќна позиција како раководител на Инспекциски совет.
Жителите на слепаат уличка „Пржино“ веќе неколку години се обидуваат да ја спречат изградбата на четирите четирикатници бидејќи доселувањето на уште шеснаесет семејства во нивното маало значително ќе го наруши нормалното живеење, функционирање и безбедноста. Два пати ја оспорија градежната дозвола за градба, но на крај Министерството за транспорт и врски донесе одлука во корист на инвеститорите „Топ метал“ и Љупчо Продановски.
Околните жители се надева дека по вчерашниот инцидент во кој за среќа нема жртви, конечно ќе се свестат и институциите и инвеститорите дека нема услови за изградба на четири станбени згради високи по 10 метри. Според нив тоа не го дозволува ни малиот простор, ни околната инфраструктура, бидејќи локацијата се наоѓа на врвот на две слепи улички „Пржино“ и „Кара Трифун“.
„Градоначалникот конечно да им забрани да градат тука, доколку не им забрани очекуваме да имаат колски влез од горната улица и да го почитуваат планот. Последното што го очекуваме е ако може ние да му го откупиме земјиштето и ако може тука да си направиме детско игралиште или било што друго“, рече Антевски.
Минатата недела имаше неколку вербални инциденти меѓу инвеститорите и жителите. Прво локалците не дозволуваа да влезе багерот. Потоа на улицата по која треба да поминува багерот послаа бело платно на кое испишаа ДУП, закон, правда, чест, а инвеститорот им ги искрши реквизитите. На оваа локација постојано интервенира и полиција.
Во денешната расправа со соседите, Исајловски од „Топ метал“ им довикна: „Само проблеми ми правите, едно кафе не сте ме почестиле“.
Кусо видео во кое објаснуваме каде затаиле институциите, а каде продолжиле инвеститорите
Стории на ИРЛ за урбанизацијата на Пржино
Бетонизација на Пржино: Итриот инвеститор, кутриот градоначалник
Жители на Пржино со жив штит и полициско присуство ја бранеа улицата од инвеститорски багер
Камионот на озогласениот пржински инвеститор гази по ДУП, ред, закон, право, жители и почит
