Прв пат за прислушуваните разговори, актуелниот премиер Зоран Заев, слушнал во 2013 година во јуни кога станал претседател на СДСМ.
Ова денеска го соопшти премиерот во својство на сведок за случајот „Таргет-Тврдина“, каде што беше повикан од обвинителите по неодамнешното сведочење на неговиот советник за безбедност, Зоран Верушевски.
Верушевски, како што објаснуваше Заев, го информирал дека партијата располага со документи и материјали во пишана и во аудио форма.
Дека материјалите доаѓале од институциите на државата се уверил од презентацијата на документите, а од нив констатирал дека се прави масовно прислушување.
„Во МВР, односно во Управата за безбедност и контраразузнавање се прислушувало. Тоа го утврдивме од увидот за начинот на ставање на телефоните на слушање, од аналитиката што се правела врз прислушуваниот материјал, од доставувањето на материјалите до Никола Груевски, од еднаквоста, изгледот, структурата… Сето тоа недвосмислено укажуваше дека доаѓа од МВР, односно од УБК. Во тие материјали беа доставени и разговори од посебни истражни мерки (ПИ-мерки), меѓу кои и еден дел од разговорите од посебните истражни мерки против мене со судска наредба, како градоначалник на Струмица“, одговараше Заев.
Според премиерот, главен таргет на прислушувањето била опозицијата, а потоа новинари, експерти, невладини организации, но и телефонски броеви од високи претставници од власта на Груевски.
Во сведочењето тој потенцираше дека најприслушуван бил поранешниот премиер и претседател Бранко Црвенковски, па тој, но и дека лидерите на албанските партии долго време без прекин биле следени.
Материјалите во 2013 година биле посебно чувани, а пристап до нив имале само тој и Верушевски.
Посочи дека прв консумент на материјалите бил тогашниот премиер Никола Груевски, кој пак Верушевски при првото сведочење посочи дека за овој предмет првообвинет треба да биде токму поранешниот премиер кој во моментов е азилант во Унгарија.
Заев рече дека поседувале преку еден милион различни разговори за кои го информирал Груевски.
„Информацијата дека поседувам вакви материјали ја споделив со тогашниот премиер и неколкумина стручни лица во обвинителството во кои верував. Груевски се шегуваше и на средбите дека тоа не е возможно, односно толку материјали да бидат во наш посед. По укажување на луѓе од обвинителството, одлучив да ги споделам со јавноста кои што ќе го натераат општествениот систем соодветно да се позиционира“, сведочеше тој.
А во од однос на прашањето на обвинителот Трајче Пеливанов кој го праша сведокот колку пати во тој период се сретнал со Груевски, Заев одговори дека имале четири состаноци со поранешниот премиер.
По сведочењето на кое одбраната и обвинетите немаа прашања за премиерот, во изјава за медиумите, Заев потенцираше дека иако Груевски е прв консумент, одговорност смета дека има и кај тогашната министерка за внатрешни работи, Гордана Јанкуловска, тогашниот директор на УБК, Сашо Мијалков и обвинетите во бегство Горан Грујевски и Зоран Бошковски.
Прашан зошто името на поранешниот шеф на УБК, Сашо Мијалков не го споменал во судница и дали се прават обиди за негова амнестија, Заев одговори:
„Груевски е краен конзумент, но се подразбира дека и Сашо Мијалков и тоа како е виновен како тогашен директор на УБК. Сепак лошотијата, злобата доаѓа од тој што го конзумирал тоа, чесниот политичар го спречува тоа и го пријавува. Сите во веригата го прекршиле законот и тука дилема нема. Јасен е случајот како бел ден“, изјави премиерот.
Денешното сведочење на Заев следува откако пред две недели заврши со исказ поранешниот разузнавач и негов советник, Зоран Верушевски. До сега во овој случај сведочеа и двајцата свиракачи од УБК, Ѓорѓи Лазаревски и Ѕвонко Костовски.
Во Таргет-Тврдина првообвинет е поранешниот директор на УБК Сашо Мијалков, поранешниот началник на Петтата управа во МВР Горан Грујевски и вработениот во УБК Никола Бошкоски, како и поранешната министерка за внатрешни работи Гордана Јанкулоска, шефот на кабинетот на Мијалков, Тони Јакимовски, Владимир Варелов од УБК и уште пет други лица од Управата.
Според обвинителниот акт, преку три системи за следење на комуникациите во УБК, во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби.
