Press "Enter" to skip to content

Случај „Пелагонија“: Телохранителот на Груевски држел без пари фитнес клуб среде студентски дом, го „честеле“ директорите

12.06.2019

Поволна кирија за телохранителот на поранешниот премиер или таква која нема никаква пазарна логика. Со државни ресурси „гладијаторот“ Тоше Зафиров држел приватен фитнес клуб којшто директорите на ДУИ и ДПА лажно и го претставиле на јавноста како проект од интерес на студентите. 

Во 2007 година директорот на студентскиот дом „Пелагонија“ Азем Садиќи преку медиумите го најавува проектот „Во здраво тело здрав дух“ и најавува фитнес сала за студентите. Впечатокот којшто се стекнува е дека домот преку пренамена на просторот на осмиот кат ќе направи фитнес сала за студентите. Но, никој не кажа дека таа ќе се издава на приватно лице за тоа да врши комерцијална дејност и да остварува профит без притоа да се оправда интересот на студентите и самата институција. Државниот ревизор ова го посочува во својот извештај од 2010 година по којшто е покрената и кривична пријава за вкупно тројца директори, меѓу кои и актуелниот кој во моментов работи без мандат. ИРЛ открива дека седум години институциите ја чуваат во фиока иницијативата за кривична пријава против директорите. Еден од нив е близок човек на Али Ахмети – Бујар Муртезани, актуелниот директор на „Пелагонија“.

Случај Студентски дом „Пелагонија“: Пеколни домаќини на пеколен дом

Што открива ревизорскиот извештај

Во женската зграда во Студентскиот дом „Пелагонија“  на осмиот кат се уште може да види рекламата за фитнес клубот „Гладијатор“, кој до пред три години се наоаѓаше во студентскиот дом Пелагонија. Името на Тоше Зафиров – телохранител на поранешниот премиер Никола Груевски е на неколку места на рекламата. Официјалната веб страна на фитнес клубот (која сега е нефункционална) е www.zafirovtose.mk.

Вратата од поранешниот фитнес клуб

Во 2007 година тој ги добива просториите од 230 квадрати во домот на 15 години со договор доделен од првиот од тројцата директори, Азем Садики од ДПА. Оглас немало. Кирија не плаќал, само 2,000 денари за парно и струја, иако сметките биле значјано поголеми. Ревизорот вели дека домот има право да создава приходи само ако се во функција на подобрување на студентскиот стандард и доколку студентите имаат директна корист. Ревизорот констатира дека ова начело од статутот на домот не било применето, а сопственикот остварувал профит и водел комерцијален бизнис. Таму доаѓале луѓе од цело Скопје за да вежбаат, а за  студентите немало ниту попуст. Ако некој сакал да вежба, требал да плати месечна членарина од 700 денари. За студентите немало никакви поволности.

За овој, според ревизорот штетен договор, молчел и следниот директор на ДУИ, Исмаил Абази. Ова траело до 2009 година кога Управниот одбор дознава за случајот. Во тој момент в.д. директор е Бујар Муртезани. Наместо да го раскине како што бара Управниот одбор, тој прави анекс кон договорот на пет години, овојпат со зголемена кирија од 25, 000 денари  вклучувајќи и парно, струја и вода во цената.

„Договорот е склучен на 15 години(25.9.2022 година), а закупецот требал да плаќа само две илјади денари месечено за трошоците за парно и струја во сите простории. По ревизија направена од министерството за финансии, било утврдено дека просториите кои се наоѓале во поткровен простор биле со големина од 230 метри квадратни, а освен студентите клубот го посетувале и надворешни лица, што значи дека клубот првично наменет за студентите имал комерцијален карактер и додека сопственикот од ова  остварувал приходи, државниот дом ги покривал сите трошоци“, пишува во извештајот.

Овие простории се издавале до 2016 година, од кога теретаната е пренаменета во читална за студентите од домот.

Никола Груевски и Тоше Зафиров

Во ревизорскиот извештај, вакви примери има неколку. На пример во 2008 година, бил склучен договор со приватна здравствена ординација за закуп на 3 канцеларии со вкупна површина од речиси 75 метри квадратни. Договорот бил склучен на четири години. Две години подоцна со истиот закупец е склучен договор за издавање на уште две канцеларии со површина од 58 метри квадратни. За издавањето на овие простории домот во својот буџет месечно требал да добива по 24.000 денари. Во оваа цена, влегувале и трошоците за струја, парно греење и вода. Одлуката за колку пари да се плаќа закупнина директорот ја донел сам.

За сите овие недоследности и незаконитости кои се напишани во ревизорскиот извештај тимот кој ја правел ревизијата смета дека ваквото работење на директорот кој одлуките ги носел сам, без никаков документ од Управниот одобор и без утврдена пазарна цена за закупнина со вклучени комунални услуги, придонесува домот да внесува помалку пари во буџетот, додека приватните лица на кои им се давале просториите под закупнина добивале корист.

Расипништво без контрола

Ревизорските извешти од 2009 година за буџетската и самофинансирачката сметка на „Пелагонија“ покажуваат дека таму не се знаело кој пие, а кој плаќа. Сметководството било неуредно и неажурно. Незаконски се исплаќале пари за договори на дело, се склучувале договори без да се спроведат јавни набавки. Се делеле тендери на фирми кои имале нецелосни понуди, се потпишувале договори без да заврши процедурата за јавната набавка.

Фактури се издавале без докази за што се потрошени парите. Во 2009 година за телефонски услуги биле потрошени 284 илјади денари. Се јадело и пиело на сметка на домот, кој сакал и кога сакал, па така за 2009 биле потрошени 379 илјади денари за угостителски услуги.

Според тимот ревизори кој ја правел ревизијата, сето ова овозможувало парите на домот да се трошат незаконски и ненаменски.

Партиски легла за партиски луѓе

Изборот на соби во 2009/10 година го вршеле тројца преставници на СПУКИМ, наместо истото да биде вршено од комисијата за прием на студенти формирана од МОН. За приемот на студенти во домот нема информации, поради што ревизорот предупредува дека постои неосновано вселување на студенти по субјективно одлучување на едно лице, без почитување на правилата за рангирање, со што се загрозува студентскиот стандард.

Студентите уште одамна предупредуваа дека за да се добие соба во студентски дом потребна е партиска книшка или врска кај директорот. Неколку студенти во изјави за СКУП раскажуваат како тие и нивните цимери ги добивале собите. Студентот М.С. вели дека познавал студенти кои биле приморани да одат да гласаат за претседателот на СПУКМ за да добијат соба.

Додека обвинителството и МВР се уште си ја префрлаат топката околу случајот кој седум години е во предистражна постапка, Бујар Муртезани, едниот од директорите  кој се истражува за злоупотреба на службената положба и овластување се уште директорува со „Пелагонија“.