Македонија денеска обележува 28 години од својата самостојност. На денот на независноста, граѓаните на оваа земја се потсетуваат како сме почнале. Улогата на медиумите е да учествуваат во овој празник, не само со репродукција на партиски и институционални соопштенија, туку да направат и осврт и да дадат перспектива на клучните постигнувања, проблеми и предизвици. Ние решивме да подготвиме серијал приказни од еден поинаков агол – до каде е Македонија и зошто не е таму каде што требаше да биде.
Во бирократиите хартијата е моќ. Како дел од дигитлната трансформација, владите низ светот бараат начини да ја подобрат и транспарентноста и ефикасноста во давањето услуги на граѓаните. Во развиениот свет тоа се прави преку дигиталните услуги или концептот на Е-Влада. Но, дигиталцијата станува и силна алатка за борба против корупцијата, не само заштеда на времето и нервите на граѓаните кои денеска се мачат низ шалтерите на институциите.
Всушност, многумина ќе речат дека не само што е важна алатка, туку можеби и клучна алатка во борбата против корупцијата. Новите технологии и отворените дигитални податоци им овозможуваат на граѓаните да откријат, да спречат, па дури и да предвидат коруптивни пракси кои во куповите хартија можат лесно да бидат сокриени и невидливи.
Често знаеме да се пофалиме со својот развиен ИТ сектор. А, сепак, Македонија се мачи да ги дигитилизира своите институции. Верувале или не, токму дигитализиацијата е една од мерките за борба против корупција. Погледнете ја видео сторијата во којашто ги бараме одговорите за причините за задоцнетата дигиталиција. Со ИРЛ разговараат актуелниот министер за информатично општество и администрација, Дамјан Манчевски, и неговата претходничка и актуелна советничка на српската влада и експерт на Обединетите нации, Марта Томовска Арсовска.
