Албанското Специјално обвинителство за борба против корупцијата и организираниот криминал (СПАК) заплени вила во луксузен туристички комплекс на Јонското море која ѝ припаѓа на разрешената албанска вицепремиерка и министерка за инфраструктура Белинда Балуку. Според истрагата, таа фаворизирала фирма зад која стои почесниот конзул на Македонија во Гњилане (Косово), Валон Адеми, за изградба на обиколницата околу Тирана. За возврат фирмата ѝ изградила куќа со поглед кон морето. Во МНР во Скопје недостасуваат документи за неговото именување.
Известува: Иван Блажевски
Разрешената албанска министерка за инфраструктура и вицепремиерка Белинда Балуку (на функцијата од 2019 до 2026), против која се води истрага за корупција, го фаворизирала конзорциумот „Alko-Impex General Construction“ и „2T“ во тендерот за изградба на дел од обиколницата околу Тирана, со проценета вредност од околу 24 милиони евра.
Тендерот бил склучен во 2021 година со албанската Управа за државни патишта.
За возврат, како што деновиве соопшти албанското Специјално обвинителство за борба против корупцијата и организираниот криминал (СПАК), Балуку побарала фирмата „Alko-Impex General Construction“ од Тирана да ѝ изгради луксузна куќа на јонскиот брег и тоа се случило.
Во сопствеништвото на истоимената фирма-мајка од Косово ортак е Валон Адеми, косовски бизнисмен и почесен конзул на Македонија во Гњилане, лице кое е во фокусот на албанската јавност и поради изградбата на новиот аеродром кај Валона.
Имено, како награда за Балуку да го намести тендерот, фирмата ѝ изградила семејна вила во комплексот „Green Coast“, кај популарното албанско туристичко место Дерми.
„Обвинетата Белинда Балуку, поради функцијата министерка за инфраструктура и енергетика, во замена за фаворизирање на фирмата ’Alko Impex General Construction‘ во горенаведената постапка за јавна набавка, побарала и добила од лицето Арбер Абази, незаконска корист во форма на инвестиции/градежни работи на објект“, открија обвинителите од СПАК.
Арбер Абази е управител на фирмата, имотот има површина од 478 м2, а се проценува на близу половина милион евра.
За да ја скрие куќата Балуку го користела поранешниот албански фудбалер Игли Таре (бил и спортски директор во ФК Лацио и Милан од Италија), преку фиктивни договори за сопственост, за вилата формално да биде регистрирана на негово име.
„Од истрагата произлегува дека обвинетата Белинда Балуку е фактички сопственик на недвижниот имот ’семејна вила 2 F бр. 188/1, Јадро 27’ … за кој се утврди дека е скриен имот“, наведе СПАК во соопштението.
Ова е втора вила поврзана со Балуку што СПАК ја конфискува во рамките на процесот против неа кој вклучува повеќе наоди за корупција во различни јавни проекти. Претходната беше во комплексот „White Rock“ исто така кај селото Дерми, повторно регистрирана на името на фудбалерот.
Инаку, „Alko-Impex General Construction“ е фирма основана во Приштина во 2004 година, чиј сопственик е Имер Адеми, косовски бизнисмен и татко на нашиот почесен конзул Валон Адеми, кој во еден од документите се води како ортак.
ИРЛ во јули годинава објави истражувачка сторија која се однесуваше на финансирањето на изградбата на новиот аеродром кај албанскиот приморски град Валона и за улогата на Валон Адеми во тој проект. Тој се наоѓа во фаза на сериозни судски постапки и истраги и пред раскинување на договорот со албанската држава.
Во МНР празно досие за именувањето на Адеми
За почесен конзул на Македонија Валон Адеми бил именуван со решение на Владата на Зоран Заев во декември 2020 година без да има какво било минато во билатералните односи на Косово со Македонија.
Решението го потпишал тогашниот вицепремиер Артан Груби од ДУИ кога министер за надворешни работи беше неговиот сопартиец Бујар Османи.
Претходно Адеми беше почесен конзул на Албанија во истиот град. Но, Тирана без образложение му го прекина мандатот во јули 2019, што дел од косовските и албанските медиуми уште тогаш го поврзаа со наводен криминал со тендери во Албанија.
Адеми го има и низ полициската евиденција во Косово. Неколку месеци пред да стане почесен конзул на Македонија, бил пријавен во косовската полиција од страна на тогашниот секретар во косовското Министерство за инфраструктура и животна средина, Бетим Речица, поради упатени закани кон него и семејството.
Потоа на крајот на јануари годинава бил пријавен во косовската полиција бидејќи физички го нападнал директорот за капитални инвестиции во Општина Приштина, Сокол Хаволи.
Дознавајќи за овие информации, ИРЛ врз основа на Законот за слободен пристап до информации од јавен карактер во МНР во Скопје ја побара документацијата за процесот за назначувањето на Адеми. Папката што ја добивме беше речиси празна.
Потоа по објавувањето на сторијата за аеродромот, од МНР во јули летово нè информираа оти започнале внатрешни проверки за случајот. Најавија дека ако има неправилности, како што утврди ИРЛ, Адеми ќе биде разрешен. Именувањето се разгледува и набрзо ќе има одлука.
Дополнително откривме и дека семејството Адеми фирма со исто име „АЛКО-ИМПЕКС-Генерал Констракшн“ во мај 2024 година регистрирало и во Македонија со седиште во селото Семениште кај Сарај. Регистрираната дејност ѝ е изградба на патишта и автопати. Според актуелно достапните информации, досега не учествувала на јавни тендери во земјава.
