Мексикански новинар кој известуваше за организиран криминал и нарко картели, петокот беше застрелан и убиен во неговиот дом во северна Сонора. Ова е третиот новинар кој е убиен во Мексико оваа година.
Сантијаго Баросо (47) ја отворил својата врата откако слушнал тропање, по што бил застрелан. Тој бил погоден еднаш во градите и двапати во стомакот, според Мрежата на новинари на Сонора, организација во која тој бил член.
Атентатот беше означен како “напад врз слободата на изразување” од страна на Јесус Рамирез Кувеас, портпарол на претседателот Андрес Мануел Лопез Обрадор.
Соседите велат дека напаѓачот кој дошол во домот на Баросо испукал 10 куршуми, а бил придружуван од жена, објави локалниот весник „Мексико Вести Дејли“. Баросо успеал да се врати внатре во домот и да повика брза помош, но подоцна во болницата бил прогласен за мртов.
Два дена порано, „Новинарите без граници“ објавија дека побарале од Меѓународниот кривичен суд да ги испита злосторствата на насилството врз новинарите во Мексико, истакнувајќи го “пасивното соучество од страна на властите”.
“Многубројните убиства и киднапирања на новинари … мора да се сметаат за злосторства против човештвото”, се вели во соопштението.
Баросо беше водител на локална радио-емисија, ја предводеше веб-страницата за новости на „Црвен 653“ и беше соработник на неделниот весник „Контрасена“.
Не е јасно дали неговото убиство е поврзано со неговата работа, но тој е трет мексикански новинар убиен оваа година според групата за застапување на медиумите Член 19. Организацијата забележа 124 новинари убиени од 2000 година во Мексико и 99,75% стапка на неказнување за таквите злосторства.
Претседателот Лопез Обрадор претходно вети дека ќе се справи со проблемите, но тврди дека тоа е тешко да се докаже.
“Населението на земјата е во состојба на беспомошност”, рече тој.
Мексиканскиот министер за безбедност, Алфонсо Дуразо, вети федерална поддршка за полициската истрага за смртта на Баросо во пост на Твитер.
Преземено од Меѓународниот проект за известување за организиран криминал и корупција.
