Press "Enter" to skip to content

Нефи Усеини во Турција заминал на операција на синуси

27.10.2020

Нефи Усеини го пропушти последното рочиште на кое му се суди за насилство врз негов сограѓанин, а неговите адвокати во судот во Охрид го оправдаа дека заминал на операција во Турција. Според информациите кои ИРЛ ги доби од неговиот адвокатски тим, Усеини закажал операција на синусите.

„Нефи Усеини замина пред неколку дена на операција на синусите во приватна болница во Истанбул. Не знам колку ќе се задржи таму, но пред операцијата има неколку дена подготовка, па следува операцијата и потоа закрепнување. Целата медицинска документација ќе биде доставена до Судот во Охрид по неговото враќање во земјава“, изјави неговиот адвокат Никола Цобоски.

Претседателот на судот во Охрид, Васил Баткоски, во разговор со ИРЛ рече дека пасошот на Нефи Усеини не му бил одемен и тој можел да ја напушти државата. Баткоски вели дека Усеини до судијката која го води предметот, Билјана Белевска Пројковска, доставил авионски карти за престојот во Турција. Според неговите информации Усеини ќе се оперирал во Анкара. Но, повеќе детали не можел да открие, бидејќи станувало збор за лични податоци. Кога го прашавме дали постои опасност од бегство, тој рече „никогаш нема да оставиме само на формата“.

„Последиците за нејавување на рочишта се знае кои се. Усеини има дадено гаранција од 850.000 евра дека ќе биде достапен за судските органи“, изјави Баткоски.

Нефи Усеини и неговиот брат се обвинети за насилство што се случи на 18 август пред хотел во Охрид, кога физички го нападнале  охриѓанецот Спиро Топаловски. На браќата им беше одреден притвор од осум дена, но тие шест дена беа во бегство, по што сами се пријавија во затворот во Охрид.

Нефи и Ибраим Усеини понудија гаранција во висина од 30.000 евра во кеш за да им се укине мерката притвор или да им се замени затворскиот со домашен притвор или друга поблага мерка. Обвинителството не ја прифати првата понуда, па потоа браќата Усеини понудија гаранција од 850.000 евра во недвижен имот и беа пуштени да се бранат од слобода. Во притвор беа 16 денови.

„Основниот суд во Охрид одлучи да ја прифати понудената гаранција од недвижен имот во вредност од 850.000 евра и да им дозволи на двајцата обвинети да се бранат од слобода. За понудената гаранција позитивно мислење даде и Основното јавно обвинителство Охрид, со оглед на тоа што во предметот веќе беа прибрани сите вербални и материјални докази за поддршка на обвинението. Нагласуваме дека гаранцијата претставува ефективна мерка за обезбедување на присуството на обвинетите во текот на кривичната постапка“, ни изјавија од Јавното обвинителство.

Според информациите кои ги објавија медиумите, Нефи Усеини како залог ставил деловен простор со површина од над 200 метри квадратни во новоизградена зграда во Охрид. Во вакви случаи проценка на вредноста на имотот врши проценител ангажиран од страна на одбраната. Според праксата во судството, обвинет може да замине на лекување во странство кога станува збор за итна операција или тешка болест. Но, не во случаи кога има здравствени проблеми за кои не постои опасност по здравјето.

Нефи Усеини е прв човек на огранокот на ДУИ во Охрид

Истепаниот Топалоски ја смени изјавата

Жртвата Спиро Топалоски по инцидентот на 18 август во полиција пријавил дека врз него бил извршен физички напад, како и дека биле упатувани закани кон него и кон неговиот малолетен син со огнено оружје од страна на Усеини и уште неколку лица.

Но, додека тие беа во бегство, тој излезе со друга изјава во која рече дека написите што излегоа во јавноста се извадени од контекст. Топалоски изјави дека во расправијата не видел оружје, дека се работи за недоразбирање кое е надминато и дека Усеини бил и ќе биде негов пријател. Па, така од првичната верзија дека браќата поседувале нелегално оружје, во обвинението тие се товарат само за насилство.

На вчераното рочиште во судот не се појави ниту оштетениот Спиро Топаловски, поради тоа што имал оперативен зафат на забите и не можел да зборува. Присутен беше само обвинетиот Ибраим Усеини, братот на Нефи. Следното рочиште е закажано за 27-ми ноември, а закажан е уште еден термин на 3-ти декември со цел забрзување на процесот.

Недопирливиот Нефи Усеини

45- годишниот Усеини е советник на ДУИ во општината Охрид и истовремено бизнисмен кој гради и поседува дивоградби во градот и околината и кои досега не се урнати, освен бетонската база на влезот во Охрид.

Тој не е било кој граѓанин, и досега можеше да прави кривични дела без да ги издржи затворските казни. Имал многу кривични пријави, но само една условна пресуда. Тој бил гонет за насилство, тешки кражби, предизвикување општа опасност, фалсификување патни исправи, загорзување на безбедност, но не одлежал ниту еден ден затвор. Учествуваше во борби со кучиња и видеата од нив ги објавуваше на социјалните мрежи без да се плаши дека ќе го побара полиција. Во Нефи и неговите постапки, судската, извршната и законодавната власт не гледаат проблем. Со нивна помош тој засега остануваше над законот.

Поврзани стории

Нефи Усеини од бегство си отвори фирма во Битола

Последно истражување

Бетонизација на Маврово