Press "Enter" to skip to content

Миле Зечевиќ на платен список во Стопанска банка Битола и во Влада

13.03.2019

Миле Зечевиќ, функционер на СДСМ и советник на премиерот Зоран Заев, и официјално стана дел од раководството на Стопанска банка – Битола. Тој на денешното Собрание на акционери е избран за независен член во Надзорниот одбор на банката како предлог на „Пелистерка“. Зечевиќ за овој ангажман ќе добива по 50.000 денари.

Заедно со Зечевиќ се избрани и Дејан Панделески, Иванчо Велјановски, Александра Радевска, Илија Тозија и Игор Камбовски.

Миле Зечевиќ работи како адвокат и е организационен секретар на СДСМ. Премиерот Зоран Заев го именуваше и за надворешен советник во Владата за адвокатски услуги.

Миле Зеќевиќ со премиерот Зоран Заев на преговори за консензуален претседател (февруари 2019)

Кога беше именуван за член на Надзорен одбор на Стопанска банка – Битола тој за ИРЛ рече дека тоа е во име на долгогодишното пријателство со Дејан Панделески, сопственикот на „Пелистерка“, а одамна е адвокат на фирмата ќерка на „Пелистерка“ – „Еуро дистрибуција“.

Панделески е кумашин на поранешниот министер за транспорт и врски, Миле Јанакиески, и син на Цветан Панделески, кој е директор на ЗИК „Пелагонија“ и е осомничен во случајот „Империја“ на СЈО.

Според организациската поставеност на банката највисок орган е Собранието на акционери, а потоа доаѓа Надзорниот одбор во кој треба да влезе Зечевиќ и кој ќе ја контролира работата на Управниот одбор. Според Статутот, Надзорниот одбор го одобрува годишниот извештај за работењето на банката, именува и разрешува членови на УО, го одобрува буџетот, програмата и плановите на банката.

Во акционерската структура на Стопанска банка Битола во 2011 година акционер стана оф-шор фирма „Ексико“ преку Земјоделскиот комбинат Пелагонија, како и фирмата „Тимох“ која е под дистрага на СЈО во случајот „Империја“.