Пишува: Лила Караташева
Вонреден инспекциски надзор ќе се прави за Деталниот урбанистички план Ј 07, кој меѓу другото овозможува да се гради и на падините на Водно. Инспекција ќе врши Државниот инспекторат за урбанизам и градежништво, oткако граѓаните од улицата „Питу Гули“ негодуваа што над нивните куќи каде што започнува парк шумата Водно треба да никне нов бетонски монструм во режија на фирмата „Маркеза“. Силните реакции на жителите и јавноста иницираа советничката група од „Шанса за Центар“ да поднесе предлог до општинскиот совет да се ревидира целиот случај. Одлуката била поддржана од сите советници, а први заклучоци дали има спорни елементи за да се гради во овој дел на Водно треба да добијат до средината на јануари. Според ова, Инспекторатот треба да направи целосна проверка, а од тоа евентуално да произлезе времена мерка која би можела да го запре на одредено време новиот бетонски подвиг и новата урбанизација на сметка на децениското зеленило и белите дробови на градот.
„Со оглед што до сега општинските служби не нашле начин како да се справат со овие проблеми, се бара Државниот инспекторат за урбанизам и градежништво да излезе најитно на терен, да ја увиди грешката и да донесе одлука за неспроведување на планот. За ново проектираните улици кои ќе овозможат пристап до парцели за градење и сериозно ќе навлезат во шумата на Водно, а сите ние ќе изгубиме зеленило кое не штити од поплави ерозии и загадувања, повторно е план кој овозможува корист за малкумина, а штета за многумина. “ – Советничка група „Шанса за Центар“
Паралелно со одлуката на политичарите од советот, битка водат и жителите од улицата „Питу Гули“. Додека очајнички и по секоја цена се обидуваат да ја спасат парк шумата, се под постојана закана дека ќе пристигнат багери и ќе почнат да го подготвуваат теренот за нов објект. Денеска мајстори ангажирани од фирмата изведувач „Маркеза“ правеле „извидница“ на теренот и барале решение како тешката механизација да стигне до непристапниот терен до кој што нема пат. Дел од граѓаните со кои што разговараше ИРЛ, стравуваат дека можеби веќе утре механизацијата ќе се стави во погон, на ден кога сите служби во државата ќе започнат со празнување на Нова година.
Важечкиот ДУП предвидува нова улица до плацот без пат. Но, за евентуално овој процес да започне одобрение за да се направи оваа сервисна улица треба да даде општина Центар оти имотниот лист кој го извади ИРЛ покажува дека земјиштето е во сопственост на државата.
Сега граѓаните од улицата „Питу Гули полагаат надеж во Уставниот суд и уставните судии кои треба да одлучуваат по иницијатива на „Општина Центар“ да се укинат ДУП-овите донесени во 2014 година кои ја поместија линијата на градење и влегоа подлабоко во падините на Водно – простор кој стана интересен за многу бизнисмени.
Од Уставниот суд за ИРЛ изјавија дека оваа иницијатива ќе биде доделена за работа на нов судија затоа што до сега овој предмет го работел судијата Јован Јосифовски на кого му завршува мандатот на 14 јануари. Ова остава простор новиот судија да одлучи дали ќе ги прифати наодите во рефератот кој веќе е изготвен или ќе има сосема поинакво мислење. Според Уставен новиот судија ќе има полно право да го смени рефератот и може да даде предлог за поведување на постапка. Но, сепак без оглед на тоа што ќе биде предложено, уставните судии на крај ќе мора да гласаат. И да остане истиот предлог и оваа иницијатива да биде отфрлена може да не го добие потребното мнозинство на гласови.
„Во најголем број случаи ја почитувам уставно – судската пракса, но тоа не значи дека ќе гласам како што се гласало претходно и ќе ја прифатам претходната одлука. Секогаш постојат исклучоци, односно не се исклучува можноста да се гласа поинаку од претходно во зависност и од наводите и иницијативата“ – изјави за ИРЛ претседателката на Уставниот суд, Добрила Кацарска.
Богдановиќ немал поплаки од граѓаните, вина гледа во Уставниот суд
Поранешниот градоначалник на општина Центар, Саша Богдановиќ, кој непосредно пред да замине од позицијата даде зелено светло да се гради на падините на Водно, вели дека не знаел оти граѓаните поднеле документ до неговата администрација со молба таму да не се гради. Тој смета дека може да се издаде одобрение за градба и покрај тоа што до парцелата нема пристапен пат и дека експропријацијата на земјиштето која ќе им отуѓи дел од имотот на граѓаните може да се врши паралелно со изградба на објектот. Богдановиќ рече дека не ги добил ниту извештаите од Институт за земјотресно инженерство и сеизмологија (ИЗИС) чија екипа била на теренот за да направи мерење на просторот.
„Општината Центар нема моќ да ги промени работите додека повисоките институции не преземаат ништо. Во 2014 година Уставниот суд се прогласи за ненадлежен за ова прашање, а подоцна кога Советот на општина Центар донесе одлука за укинување на ДУП-овите Уставниот суд ја поништи одлуката со образложение дека само Уставен суд може да укинува акти“ – изјави Богдановиќ кој смета дека проблемот со Дупот зависи од контрадикторните одлуки на Уставниот суд.
Директорот на ИЗИС, Влатко Шешов вели дека веднаш до општината го проследил извештајот од мерењата кои морале да бидат лимитирани поради неможност да пристапат до парцелите. Шешов вели дека бил информиран од страна на Богдановиќ околу изградбата на патот до парцелите и дека го предупредил за последиците од изградбата на пристапна улица, бидејќи ќе се наруши природната стабилност.
„Не знам ни како воопшто ќе се доаѓа до парцелите. Срамота е мерките да не се спроведат, да се сечат дрвја и да се уништува шума. Како градежен инженер не можам да кажам дека е невозможно нешто да се изведе, но дали ќе биде направено според стандардите треба да се грижат државните органи“ – изјави директорот на Изис, Влатко Шешов кој предупредува на ерозија на земјиште доколку не се испочитуваат правилата.
Новиот градоначалник смета дека се’ што досега е направено на Водно е погрешно
Еден ден пред да почнат подготовките за изградба на станбената зграда, жителите од Водно биле повикани во Општината Центар да ги кажат своите проблеми пред новиот градоначалник кој боледува од Ковид 19, па наместо со него средбата била одржана со Ѓорѓи Трајчев, а присутен бил и архитектот од Секторот за урбанизам – Дамјан Цингарски.
„Му ги кажавме нашите проблеми, му ја покажавме нашата жалба која е одбиена од Второ степената комисија и дури ни на него не му беше јасно зошто е нашата жалба одбиена – Леана Таќи, жител од улицата „Питу Гули“
ИРЛ го контактираше урбанистот Дамјан Цингарски кој рече дека има желба да го каже својот личен став за ова прашање, но не може да го стори тоа заради функцијата која ја извршува во општината.
Новиот градоначалник на општина Центар, Горан Герасимовски, вели дека откако почнало неговото извршување на функцијата бара начин како да го реши проблемот со парцелите на Водно. Смета дека граѓаните треба да знаат дека е тешко да се направи нешто кога веќе има издадено решение за градба. Тој бара вина во претходното раководство на општината и не упати да го прашаме претходниот градоначалник зошто за тој дел од ДУП – от немало мораториум.
„Таму не треба да се гради затоа што е тоа Водно, се’ што е направено до сега на Водно воопшто не требало да се направи. Станува збор за трусно земјиште и лизгав терен. Недозволиво е да се уништува планината.“ – вели Герасимовски.
Министрите доаѓаат да ги сослушаат барањата на граѓаните, а потоа ги одбиваат
Разочарувањето, паниката и недовербата во институциите растат кај жителите од улицата „Питу Гули“. За време на предизборната кампања, тогашниот кандидат за градоначалник Горан Герасимовски, во придружба на министерот за транспорт и врски Благој Бочварски биле во посета на улицата „Питу Гули“ и им дале ветување на граѓаните дека ќе направат се’ за да го спречат дивеењето на Водно.
„Доаѓаат за време на изборните кампањи за да ни помогнат, а потоа ни одмагаат. Жалбата која ја испративме до Министерството за транспорт и врски е одбиена и потпишана од истиот министер кој имаше прилика во реалноста да види во каква шума треба да никнат згради“ – Леана Таќи.
Во телефонскиот разговор министерот Бочварски ни’ кажа дека граѓаните го запознале со случајот и му покажале документи. Тој смета дека Општината Центар има право да покрене иницијатива за промена на ДУП – от, но дека ќе бидат внимателни и претпазливи бидејќи парцелите се веќе приватна сопственост и на крајот истата општина ќе треба да им враќа пари на сопствениците.
„За жал, штетните одлуки кои ги носела општината на времето ќе треба да ги плаќаат граѓаните. Истите тие луѓе од Центар ќе треба да ги платат штетите на некој што издал штетен план“ – изјави Бочварски во телефонскиот разговор.
Жалбата од граѓаните која е проследена до Министерството за транспорт и врски е одбиена заради тоа што граѓаните навеле дека до парцелите нема пристапен пат. Комисијата на Министерството за транспорт и врски, постапила според ДУП – от, сметајќи дека на планината постојат две пристапни улици кои во реалноста не постојат.
Портпаролот на Министерството за транспорт и врски, Кире Коцевски ни објасни дека комисијата на министерството одлучува само според тоа што го гледа во ДУП – от, односно не ја гледа фактичката состојба на теренот. Кога му кажавме дека одлуката на министерството е спротивна на ставот на Бочварски, тој не’ побара и се огради од нашиот претходен телефонски разговор. Ни’ кажа дека во телефонскиот разговор не дал никаква изјава и дека доколку сакаме изјава треба да се најавиме и да закажеме снимање во неговиот кабинет.
Го прашавме министерот дали на средбата со граѓаните кога ја посетил лично улицата „Питу Гули“ видел дека до плацот не постојат улици, причина поради која ја одбил жалбата на граѓаните чии проблеми бил да ги сослуша.
„Јас стојам зад решението на Министерството за транспорт и врски и тоа е мојот став. Јас таму не бев да гледам улици, бев заедно со градоначалникот да се видиме и да поразговараме со граѓаните“ – рече министерот Бочварски.
Ивица Георгиевски – Фреди „нема“ допирна точка со парцелата, но сака да се спријатели со идните соседи
Сопственикот на фирмата „Маркеза“ според документите е Филип Костиќ. Фирмата е регистрирана на неговата домашна адреса. Во последните неколку години, Костиќ влегува во деловен однос со градежната фирма „БИСИ ДООЕЛ“ во сопственост на поранешниот функционер на ВМРО – ДПМНЕ Ивица Георгиевски – Фреди.
Според документите од Централниот регистер, во март годинава има договор за закуп помеѓу „БИСИ“ на Ивица Георгиевски – Фреди кој на 8 април подигнува кредит од Стопанска Банка во вредност од 4.300.000 евра, а гаранција за неговиот кредит се побарувањата за закуп што ги има од Филип Костиќ.
Жителите од улицата „Питу Гули“ како вистински сопственик на плацот го познаваат само Ивица Георгиевски – Фреди кој во повеќе наврати бил во посета на парцелата и се обидел да ги контактира и покани соседите на мир и добрососедство.
„Ивица Георгиевски сака да ни ги наруши мирот и спокојот, а доаѓа да не убеди дека треба да бидеме добри соседи на кои утре ќе им се дружат децата. Наводно ќе гради куќа, но знаеме дека во реалноста ќе изникне станбена зграда бидејќи ги видовме скиците во општината“ – Гордана Самоникова, жител од улицата „Питу Гули“
Во нашиот телефонски разговор, Ивица Георгиевски негираше дека има поврзаност со плацот на Водно и покрај тоа што му напоменавме дека луѓето од соседството ни кажале дека тој стои зад идната градба на непристапната парцела.
„Ви кажав веќе еднаш и лани, немам никаква врска јас со тоа. Тоа е мојата изјава, не знам ништо и немам ништо таму. Ви посакувам се најдобро и вистинити информации“ – рече Ивица Георгиевски.
Како е изгласан ДУП-от
Деталниот урбанистички план за овој дел од Водно е донесен во јули 2014 година. Изгласан е со 11 гласови ЗА, 11 ПРОТИВ и еден воздржан. Во 2015 година, поранешниот лидер на СДСМ обелодени дека ДУП-овите („Тасино Чешмиче“ и „Капиштец – Водно“) каде што се наоѓаат овие парцели биле менувани со цел „да се задоволат мегаломанските афинитети на премиерот Никола Груевски“.
Во соседство на парцелата на „Маркеза“ се и парцелите чии сопственици се фирмата „Ексико“, „Кара“ на Орце Камчев, „Манд Интернационал“ на бизнисменот и поранешниот кошаркар Пеце Наумовски. Маркеза е засега единствената од оваа дружина која добила дозвола за градба од претходниот градоначалник Богдановиќ.
Поврзани стории
Богдановиќ ја фрли првата лопата на Водно и го отвори патот до плацевите на Камчев и Ексико
