Press "Enter" to skip to content

Игра на троловите

31.03.2020

Мизрахи не го дава името, Спасовски бара нејзино разрешување. Чулев обвини за злоупотреби, Петровска му поднесе кривична пријава. Трипуноски критикува за погубна аграрна политика, Димковски му испраќа деманти. Техничката влада наместо да подготвува терен за спроведување на фер и демократски избори, се претвори во ринг во кој се надмудруваат СДСМ и ВМРО-ДПМНЕ. ДУИ мудро молчи и не влегува во дуелот на троловите.

Пред предстојните парламентарни избори планирани за 12 април, земјава по втор пат ја предводи техничка влада. Првата беше формирана 100 дена пред изборите во 2016 година, а произлезе како законска обврска од „Пржинскиот договор“. Тогаш на власт беше ВМРО-ДПМНЕ и во Владата влегоа министри и дополнителни заменици на министри од СДСМ. Сега улогите се заменети, па од 3 јануари во пет министерства именувани се министерски кадри на ВМРО-ДПМНЕ.

Основна задача на преодната влада е организирање фер и демократски парламентарни избори. Но, наместо сервис на граѓаните, техничката влада се претвори во ринг на СДСМ и ВМРО-ДПМНЕ. Министрите работат за партиите, најголем дел од медиумите влегоа во барабанот на пропагандните машинерии, а граѓаните се најмалку застапени во агендата на властодржците.

Политичкиот аналитичар Петар Арсовски вели дека мандатот на техничката влада е јасен. Да обезбеди контрола врз некои клучни процеси чија злоупотреба би можела негативно да влијае на фер и демократски амбиент за изборите.

„И…толку.  Таа не е платформа сега да се решат сите политички антагонизми и тензии помеѓу партиите, ниту пак е поле за натпревар во политичка некултура.  Односно, ако досега партиите не поентирале, нема ни во техничката влада.  Но, високото ниво на политички тензии, високиот влог за двете големи македонски партии, како и тлеечкиот анимозитет го прават своето, и ние наместо координација, добиваме пинг понг на навреди и напади“, вели Арсовски.

Во сите пет министерства каде се именувани технички министри состојбата е хаотична. „Новодојденците“ имаат законско право да назначат свои советници, а истото важи и за дополнителните заменици. Внатре функционираат два засебни кабинети. Единствено што ги поврзува министрите од СДСМ и ВМРО-ДПМНЕ се врзаните потписи на сите акти и документи кои се однесуваат правните, финансиските и кадровските прашања поврзани со организацијата на изборите.

Техничка влада 2020 година

Министерска пресметка

Клучното министерство за спроведување на фер и демократски избори е за внатрешни работи. Во време на мандатот на владата на Груевски, ова министерство се претвори во паралелен штаб на ВМРО-ДПМНЕ преку кој се координирале партиски активности. МВРО-ВМРО самата го нарече и поранешната министерка Гордана Јакулоска во еден од прислушуваните разговори кои ги обелодени СДСМ.

Токму затоа пред изборите во 2016 тогашната опозициска партија СДСМ инсистираше ова министерство во предизборението да го води технички министер од опозицијата. За министер беше назначен Оливер Спасовски, а сега прв човек на полицијата во втората техничка влада е Наќе Чулев како предлог на ВМРО-ДПМНЕ.

Во ова министерство се случи и првиот куршлус по формирањето на техничката влада, меѓу министерот Наќе Чулев и дополнителната заменичка Славјанка Петровска. Чулев обвини дека лица од криминалистичката полиција се во директна спрега со криминални групи, на што Петровска одговори дека министерот шири лаги. Битката продолжи со разрешувањата и назначувањата кои ги направи Чулев на раководни лица во МВР. Неговата заменичка реши да му поднесе кривична пријава за злоупотреба на службената положба.

Последната вест од ова министерство доаѓа од таборот на Чулев кој до Јавното обвинителство за гонење на организиран криминал поднесе докази за, како што рече, злоупотреби во МВР при јавна набавка на обрасци за лични документи сторени во време додека министер беше Оливер Спасовски.

Рашела Мизрахи во политиката го направи своето деби како техничка министерка за труд и социјална политика. Ја наследи Мила Царовска, која во јавноста беше една од најпопуларните министри во владата на Заев. Втората дама која застана на чело на овој ресор наместо фокусот да го стави на социјалните теми, таа во јавноста повеќе е позната како министерка која „не го дава името“. Мизрахи одлучи да ја врати таблата на Министерството за труд и социјала на која го пишува старото име на државата – Репубика Македонија.

Рашела Мизрахи

Техничкиот премиер Оливер Спасовски денеска побара од пратениците во Собранието да ја разрешат Рашела Мизрахи. Предлогот на Спасовски треба да биде ставен на дневен ред на наредната седница.

Во Министерството за земјоделство како дополнителен заменик на министерот од ВМРО-ДПМНЕ е назначен Цветан Трипуноски. Тој секојдневно преку социјалните мрежи известува за неговите активности и посети на земјоделците.

„Честитки Трајане! Денес и официјално го надмина Зоран Заев! Не џабе рекле крушата под круша паѓа! Вака ли ќе го јакнете земјоделството!? Додека вие јадете бадеми и фстаци, за земјоделецот нема ни за леб!Срамота!“, напиша Трипуновски на неговата официјална страница на Фејсбук.

При посетите има своја екипа која ги снима и ги документира изјавите и средбите, на кои редовно зборува за погубната политика на досегашната власт. А, потоа Министерството за земјоделство преку официјалната е-маил адреса испраќа деманти на неговите обвинувања. Земјоделците се збунети. Не знаат на чии бројки и статистики да веруваат. А, медиумите се бомбардирани со соопштенија, деманти, реакции на реакциите.

Во ресорите финансии и информатичко општество и администрација дополнителни заменици на министрите во оваа техничка влада се именувани Гордана Димитриеска Кочоска и Невенка Стаменковска од ВМРО-ДПМНЕ.

Улогата на медиумите 100 дена пред избори

Дополнителен хаос во информирањето на граѓаните прават голем дел од медиумите кои само ги пренесуваат пораките, без притоа да селектираат што е информација од јавен интерес или пак да ги проверат обвинувањата.

Политикологот Арсовски вели дека медиумите мора да бидат покритични во известувањето и по селективни во тоа што пренесуваат.

„Граѓаните досега или се информирани доволно, или и сега ќе останат неинформирани.  Овој период нема да помогне многу во носење одлуки, само на површина ќе ги изнесе сите анахронизми кои веќе постоеле кај партиите.  Од тој аспект, медиумите се секако пребукирани со реакции и контрареакции, мислам дека редакциите треба тука да бидат малку покритични“, оценува Арсовски.

Директорката на Македонскиот институт за медиуми, Билјана Петковска, вели дека овој начин на комуницирање со јавноста е конфузен и некорисен.

„Има и потенцијал негативно да влијае врз интересот на граѓаните за следење информации околу активностите на владата. Ја разобличува целосната апсурдност во примената на моделот на Пржинска влада и може  да создаде уште поголем анимозитет во однос на одзивот на гласачите на претстојните избори, особено кај оние кои се  партиски неопределени“, изјави Петковска.

Техничката или преодната влада произлезе од Пржинскиот договор склучен на 2 јуни 2015 година меѓу четирите партии со тогаш најголем број пратеници во Собранието. Тие се обврзаа дека 100 дена пред наредните парламентарни избори со државата ќе раководи влада за спроведување избори или. Овој договор потоа се преточи во Законот за Влада во јули 2018 година и важи за сите парламентарни избори.