Партнер на внукот на Али Ахмети е Владимир Пјетерѓокај, а неговата компанијата „ПЕ-ВЛА-КУ“ добива атрактивни државни тендери за изградба на патишта. Тие беа дел од фирмите кои ја градеа обиколницата во Тирана во вредност од 100 милиони евра. Според известувањата на албанските медиуми оваа фирма спаѓа во групата компании за кои постоеле сомнежи дека се фаворизираат на тендери со поддршка на албанскиот премиер Еди Рама.
Известува: Бојан Стојановски;
Илустрација: Лука Блажев
Компанијата „ПЕ-ВЛА-КУ“ поседува 2,92% од акциите на „Крединс Банк“, првата приватна банка во Албанија која настана со приватизација на државната банка и банката којашто ќе го кредитира Дрин Ахмети без да вложи денар во „Соравија“. Менаџерите на „Крединс Банк“, Моника Мило и Малтин Коркути, се две од неколкуте контроверзни банкарски имиња кои во минатото фигурираа и како сопственици на ресортот „Радика“ во Маврово, а зделките на овие лица и компании во Албанија ги следеа и нерасчистени атентати.
Владимир Пјетерѓокај еден од сопствениците на „ПЕ – ВЛА – КУ“ инаку градежна компанија со низа изградени патишта во Албанија, одговараше и на новинарско прашање, дали би учествувал во изградбата на Коридорот 8 како подизведувач на конзорциумот „Бехтел и Енка“.
„Не, засега се немам пријавено“, кусо одговори Владимир Пјетероѓокај.
Дрин Ахмети самоуверено тврди дека до зделката „Соравија“ стасал самиот и без политичката поддршка на неговиот чичко Али Ахмети. Веста дека Дрин Ахмети, внук на лидерот на ДУИ, станува еден од газдите на „Соравија“ без да плати денар доведе до првата прес-конференција на член на семејството Ахмети. Неговиот удел во бизнис центарот е 39 проценти.
Фирмата која ја купува членот на семејството Ахмети има долг од над 20 милиони евра. Сепак ова не го обесхрабрило 24-годишниот претприемач да влезе во ризична бизнис операција која има големи шанси да заврши со банкрот наместо со заживување на скопскиот деловен центар во јадрото на главниот град. Од 2008 година „Соравија“ стана австриска сопственост откако објектот го откупи тогашниот „Светски бизнис центар“ за 10,3 милиони евра. Сега го продаваат со 20 милиони евра загуба.
Приказната на Дрин Ахмети: Успеав сам
На денешната прес-конференција во хотелот „Мериот“ новите сопственици на „Соравија“ дојдоа да понудат објаснувања за зделката по бројните реакции во јавноста во минатите денови коишто ги поведоа и прашањата за потеклото на имот на функционерите. Според внукот на Ахмети, причината за оваа бизнис авантура не биле конекциите на чичкото, туку инстантната хемија која се случила помеѓу извршниот директор на „Хано Соравиа“ ГМБХ, Хано Соравија и Дрин Ахмети. Според него, тоа е и причината зошто бизнис центарот доби нов сопственик преку фирмите „ПЕ – ВЛА – КУ“ од Албанија и „Тхор Индустрис“ во сопственост на младиот внук на претседателот на ДУИ.
„Верувам во неговите способности и образование, тоа е клучно“, се обрати директорот Хано Соравија пред македонските новинари на видео врска директно од Виена.
Бизнис идејата на Дрин, започнала уште лани со писмо за намери и објаснување дека младиот Ахмети и Владимир Пјетерѓокај од Албанија сакаат да инвестираат и да го купат бизнис центарот од инвестициската компанија со седиште во Австрија. Во октомври имало средба во Виена. Купувачите преку проверки утврдиле дека бизнис центарот „Соравија“ во Скопје, должи дваесетина милиони евра.
Сепак милионскиот долг не ги премислува Ахмети и Пјетерѓокај да преговараат и да го преземат центарот. Разговорите траеле до 26 мај годинава, кога се одлучило „ПЕ – ВЛА – КУ“ од Тирана и „Тхор Индустрис“ да го преземат долгот на „Соравија“ и да станат сопственици на атрактивната зграда во центарот на Скопје.
„Дрини прави добар бизнис. Ако „Соравија“ наместо во центарот во Скопје беше во Берлин или Виена и на таква локација, ќе беше многу поскапо“, рече Хано Соравија извршен директор на „Хано Соравија“ ГМБХ од Виена.
За време на целата прес-конференција инвеститорите нескриено го споделуваа воодушевувањето од лидерот на ДУИ, но сите инсистираа дека тој немал ништо со ова.
„Али Ахмети ѝ помогна на оваа држава. Немаше да ја имаме Македонија денес ако го следевме Љубчо Георгиевски да ја дели државата. Али Ахмети не го потпиша тоа и вие не го цените доволно. Не сум тука да коментирам политички изјави. Се гордеам што ми е вујко, но тој нема ништо со мојот бизнис. Нула. Ова што го прават медиумите сега е на штета на мојата мрежа на соработници“, рече денеска Дрин Ахмети по информацијата дека тој е еден од бизнисмените кој го купува бизнис центарот „Соравија“.
Kредит од албанска банка ќе ја плати бизнис авантурата на младиот Ахмети
На денешната прес-конференција упорно се туркаше тезата дека ниту младиот внук на Али Ахмети ниту пак „ПЕ – ВЛА – КУ“ на Владимир Пјетерѓокај не дале ниту евро од џеб за да се реализира трансакцијата. Кредитот во нивно име го дала банката „Крединс“ од Албанија. Станува збор за шест милиони евра кои се банкарски буст за да се разработи и заживее Соравија во Скопје. Кога љубопитните новинари го прашаа Дрин Ахмети колку од заемот ќе треба да врати како сопственик на „Тхор Индустрис“, кусо одговори.
„Не даваме наши пари. Банката ’Крединс‘ ги дава парите“, рече Ахмети.
Новите сопственици на „Соравија“ центарот ќе наследат и долг од 20 милиони евра на претходните газди. За да го оправда кредитот од шест милиони евра, сопственикот на „ПЕ – ВЛА – КУ“ рече дека има удел во „Крединс“ па затоа, нема никаква хипотека над зградата во центарот на Скопје. Бил почитуван во банката поради сопственичкиот удел, а планот да се инвестира во Македонија се реализирал откако „Соравија“ од Австрија и „ПЕ – ВЛА – КУ“ соработувале на проект на албанското крајбрежје.
За Владимир Пјетроѓокај, презимето Ахмети и партнерството со внукот на лидерот на ДУИ нема вредност во бизнис светот. Наброја дека аплицирал на тендер за изведба на канализација во Кичево со најниска понуда и не бил избран, а учествувал и на тендерот за изградба на автопатот до Блаце повторно со најниска понуда и не бил избран.
„Ниту еден тендер немам добиено“, рече Владимир Пјетерѓокај сопственик на „ПЕ – ВЛА – КУ“ од Албанија и на новинарско прашање дали некој му побарал мито, рече не.
Пјетерѓокај рече дека ја разбира емоцијата на новинарите за евентуално влијание на Али Ахмети во реализација на зделката.
„Со Дрин се знаеме четири години. Секој е нечие дете и секој е нечиј внук. Би бил радосен ако моите предци биле во позиција на Дрин“, рече Пјетерѓокај по прашањата на новинарите за роднинската поврзаност на Дрин и Али Ахмети.
Менаџерите на „Крединс Банк“, некогаш сопственици на ресортот „Радика“ во Маврово
Владимир Пјетарѓокај преку компанијата „ПЕ-ВЛА-КУ“ поседува 2,92% од акциите на „Крединс Банк“, првата приватна банка во Албанија која настана со приватизација на државната банка. Менаџерите на „Крединс Банк“, Моника Мило и Малтин Коркути, се две од неколкуте контроверзни банкарски имиња кои во минатото фигурираа и како сопственици на ресортот „Радика“ во Маврово.
Моника Мило и Малтин Коркути во февруари 2006 година ќе влезат во сопствеништвото на ресортот „Радика“ и како сопственици ќе фигурираат наредната година и пол. Сопствеништвото во тој период ќе го делат со Александер Пило, бизнисмен и еден од најбогатите луѓе во Албанија, кој и самиот беше член на Управниот одбор на „Крединс Банк“, а поседуваше и акции во банката. Пило, беше назначен и за почесен конзул на Македонија во Албанија во периодот од 2013 се до 2017 година.
Во сопственичката структура на ресортот „Радика“ фигурираше и Артан Санто. Тој беше генерален директор на „Крединс Банк“ и водечки акционер. Во 2014 година Артан Санто ќе биде ликвидиран во мафијашки стил среде Тирана. Убиството ќе го следат многу контроверзи. Мотивите и нарачателите се енигма до денес бидејќи албанската полиција не бележи напредок во истрагата. Пило, се задржа во сопственичката структура на ресортот „Радика“ до првата половина на 2017 година, кога бизнисот го презеде косовскиот бизнисмен Шериф Рамука. Пило, беше идејниот творец на луксузното село „Радика“ за кое преку заобиколување на низа закони требаше да се изградат 87 вили.
Компанијата „ПЕ – ВЛА – КУ“ е основана во 2005 година во Тирана и има подружници во Македонија, Косово и Хрватска. Официјалните документи од регистарот во Албанија, покажуваат дека сопственици на оваа фирма се Владимир Пјетерѓокај со 53% и Кујтим Арифај со 47% удел. Компанијата е основана од сегашните двајца сопственици и Петрит Имерај. Во моментот на регистрација делат по една третина од компанијата.
Но пред десет години Петрит Имерај излегува од управувачка структура на компанијата. Во 2015 година ги продава своите удели на неговите партнери. Во тој период, според податоците објавени во албански медиуми, Петрит Имерај е обвинет за измама и даночно затајување, со што според управата за даноци во Албанија, државата била оштетена за 2.5 милиони евра. Ова дело било направено преку друг субјект, „Диел-ИИБ“. Петрит Имерај бил еден од обвинетите заедно со уште повеќе од 20 луѓе.
Владимир Пјетерѓокај и Кујтим Арифај биле партнери со Петрит Имерај во уште две фирми во Албанија кои сега се затворени – „Албанија Солар“ и „Њукон Солар“. Овие две компании се отворени во 2012 година и во нивната сопственичка структура се појавуваат повеќе имиња, како она на Пјетер Додај кој е еден од обвинетите за измама заедно со Петрит Имерај.
Медиумите во земјава веќе објавија за бизнис потфатите на внукот на Али Ахмети, Дрин Ахмети. Сопственик е на компанијата „Тхор Индустрис“ основана во 2020 година а косопственик е и на фирмата „Еверест ЏД“ која има концесија за експлоатација на варовник на локалитетот Буковиќ во Зајас. Инаку „Соравија“ има 13 илјади метри квадратни деловен и 2500 квадрати трговски простор.
