Докторот анестезиолог Ваљтон Дервиши кој незаконски снимаше и емитуваше пациенти и колеги во живо на „Тик Ток“, со нова судска пресуда и со пет пати помала казна, се враќа на работа во Клиничката тетовска болница.
Лекарската комора сега нема основ да му ја одземе лиценцата на 7 години како што одлучи претходно. ИРЛ открива како преку серија процесни механизми, повторени постапки, преквалификации на делата и формални правни празнини, од пример за институционална одговорност, случајот премина во пример за институционално повлекување.
Известуваат: Маја Јовановска, Александра Денковска Гоцевска
Пред три години анестезиологот Ваљтон Дервиши од тетовската болница беше уапсен со лисици, осуден од јавноста и претставен како редок пример дека институциите конечно реагираат кога лекар ќе ја злоупотреби довербата на пациентите.
Докторот не само што незаконски снимал пациентки и колешки на гинекологија, туку дел од снимките ги емитувал во живо на својот профил на „Тик-Tок“. Тогашниот директор на болницата го пријавил случајот во полиција, по што Дервиши веднаш беше приведен и му беше одреден притвор.
Само еден месец подоцна, тој призна вина за кривичните дела „Несовесно работење во службата“ и „Неовластено снимање“. Основниот суд во Тетово му изрече казна затвор од 15 месеци, а Лекарската комора, иако привремено поради тековните судски процеси, му ја одзеде лиценцата на седум години — најстрогата дисциплинска мерка што може да ја добие еден доктор кај нас.
Со помош на повторено судење, нови нотарски изјави на дел од жртвите и серија судски одлуки во Тетово и Гостивар, затворската казна на Дервиши беше намалена на три месеци, а дел од делата беа преквалификувани. Тоа му овозможи да ги избегне законските пречки за повторно вработување и да побара враќање на лиценцата.
„Јас згрешив, признав вина, не сум знаел дека снимам. Немав никаква намера. Седумнаесет години работев таму и никогаш не сум побарал ниту еден денар да ми платат за прекувремена работа. Само за да врви работата“ изјави докторот Ваљтон Дервиши за ИРЛ.
Анализата на ИРЛ на правосилните пресуди на Основниот и Граѓанскиот суд во Тетово и Апелацискиот суд во Гостивар сугерираат дека ни судиите, ниту обвинителите не завршиле темелна и ангажирана работа за да го заштитат јавниот интерес. За докази во повторената постапка се прифаќале нотарски изјави од вработени доктори во тетовската болница кои сведочеле дека тој бил добар колега и дека тоа што го направил не сметале дека е нешто сериозно.
Извор: Јутуб канал на Телевизија 21
Нема правен основ: Како институциите чекор по чекор го затворија случајот
Во Лекарската комора постапката против д-р Ваљтон Дервиши формално сè уште не е завршена. Од Комората објаснуваат дека обвинителот во Судот на честа на комората иницирал постапка за повреди на Кодексот на медицинската деонтологија, по што биле одржани повеќе главни претреси. Во првостепената постапка на докторот му била изречена мерка времено одземање на лиценцата за работа во траење од седум години. Но, одлуката никогаш не станала правосилна.
Дервиши поднел жалба и доставил нови докази, по што Второстепениот совет на Судот на честа ја уважил жалбата и предметот го вратил на повторно одлучување.
Во повторената постапка, одбраната доставила нова пресуда од Основниот суд во Тетово со која првичната казна затвор од една година и три месеци била намалена на три месеци, во кои веќе бил пресметан и притворот. Дополнително, судот не изрекол забрана за вршење професија.
По разгледување на новите околности, во Лекарската комора повторно се одлучувало за статусот на докторот и наместо седумгодишно одземање на лиценцата, била изречена мерка времено одземање на лиценцата во траење од шест месеци.
И на оваа одлука Дервиши повторно поднел жалба, а постапката сè уште трае.
„Бидејќи со правосилна судска одлука на докторот не му е изречена мерка за забрана за вршење професија, а постапката за повреда на Кодексот на медицинска деонтологија што ја води Лекарската комора не е правосилно завршена, Комората во моментов нема правен основ за да ја одземе лиценцата за работа на д-р Дервиши“, велат од Лекарската комора.
Токму формулацијата „нема правен основ“ денес е клучната реченица во целиот случај.
Наместо оштетена пациентка, обвинителот го повикал за сведок нејзиниот сопруг
После првата пресуда од 15 месеци затворска казна, доктор Дервиши обезбедил нотарска изјава од пациентка која била дел од неговото видео објавено на „Тик-Tок“ во која таа се откажала од негов кривичен прогон и од барање отштета.
Во изјавата која пациентката Бесмира Шерифи Рамани ја нуди како нов доказ во прилог на докторот е наведено дека таа воопшто не ни била повикана да сведочи на суд, а наместо неа обвинителот го повикал нејзиниот сопруг кој воопшто не се појавувал на снимките.
Обвинителството се согласило на ново судење, а Кривичниот совет на судот во Тетово составен од судиите Хасан Асани, Јордан Велковски и Садула Идаири одлучил дека сведочењето на пациентката може да доведе до ослободување на обвинетиот. Поради тоа дозволиле судската постапка да се повтори.
Јавниот обвинител направил преквалификација на кривичните дела, па наместо да се гони за дело за кое е предвидена казна која се движи од шест месеци до пет години, во второто судење лекарот бил обвинет за кривични дела каде што минималната казна е три месеци, а максималната шест години.
Со преквалификација на делото, со минималната казна од три месеци докторот не може да биде избркан од работа, ниту пак да му биде привремено одземена лиценцата.
Судењето било закажано на 27 јуни 2024 година, а дотогаш докторот обезбедил уште три нотарски изјави од негови колешки, кои исто така биле неовластено снимани, дека се откажуваат од кривичен прогон. Судија и обвинител и во повтореното судење се Назиф Илијази и Башким Хисени, но пресудата овој пат е целосно во корист на докторот.
За првото кривично дело „Несовесно работење во службата“ казната е намалена од една година на само три месеци затвор, додека за второто дело „Неовластено снимање“ од пет месеци се преиначува во парична казна од 250 евра.
Казната од три месеци затвор му ги отвори вратите од болницата
Според Законот за работни односи вработен може да добие отказ ако со правосилна одлука му е забранета дејноста или има изречено казна затвор подолга од шест месеци. Лекарот анестезиолог, иако осуден, не спаѓа во ниту една категорија. Па, почнува паралелна битка и во граѓанскиот суд во Тетово против болницата и во Лекарската комора за враќање на лиценцата.
Во тужбата до Граѓанскиот суд во Тетово, пишува дека отказот не бил законски, бидејќи претходно работодавецот морал да поведе дисциплинска постапка. Дополнително, во решението за отказ не било наведено конкретно во што се состои прекршувањето на работниот ред и дисциплина, ниту било наведено која деловна, службена или професионална тајна ја оддал докторот.
На 30 октомрви 2025 година судот носи пресуда со која го поништува решението за отказ на Дервиши и ја задолжува болницата да го врати на работа. Судиите од Граѓанскиот суд во Тетово се повикуваат на одлука на Врховниот суд од 2016 година, во која пишува дека не постои повреда на работниот ред и дисциплина со неовластено соопштување на деловна тајна доколку претходно работодавачот во посебен акт не определил кои факти, исправи, податоци и документи се прогласени за деловна тајна. Болницата донела таков Правилник на 18 април 2023 година, четири дена откако се случил инцидентот со „Тик-Ток“ снимката.
Болницата се жалела на пресудата до Апелацискиот суд во Гостивар, но на 31 март годинава го губи спорот. И со тоа болницата ги искористува сите правни механизми за судска битка против лекарот инфлуенсер.
Последната надеж болницата ја гледа во ревизија пред Врховниот суд. Тие сè уште не постапиле по одлуката.
„Во однос на евентуално враќање на работникот на работа, установата ќе постапува исклучиво согласно закон, судските одлуки и важечките прописи, водејќи сметка пред сè за заштитата на пациентите, професионалните стандарди и нормалното функционирање на здравствената дејност. Дополнително, установата ќе ги разгледа и сите законски основи и околности кои се релевантни за понатамошниот работно-правен статус на лицето“, изјави за ИРЛ правниот застапник на болницата, адвокат Дарко Котески.
Дервиши се враќа на работа и со активна лекарска лиценца, бидејќи Лекарската комора во моментов нема правен основ повторно да му ја одземе.
Три години по апсењето, докторот кој стана своевиден симбол на институционална реакција против злоупотреба во здравството, чека повторно да се врати на работа во тетовската болница.
„Јас имам правосилна пресуда и чекам да ме викнат на работа. Поминаа повеќе од две недели, а сè уште немам никаков одговор од болницата. Не знаете низ каква голгота поминав. Без никаква намера и без никаква цел го направив тоа“, вели Дервиши.
Од Основниот суд во Тетово објаснуваат дека предметот бил квалификуван на начин што овозможил поблага санкција бидејќи ниту оштетените колеги, ниту пациентката не се приклучиле кон кривичен прогон и не побарале оштета.
Дополнително, оштетените воопшто не биле сослушани во судница затоа што обвинетиот ја признал вината во целост. Според законот, во таков случај фактичката состојба се смета за утврдена и не се повикуваат сведоци.
Од Обвинителството велат дека пресудата ја сметаат за законита и соодветна на околностите во случајот.
Така, предметот што почна со апсење, јавен шок и пораки за нулта толеранција кон злоупотреба на пациенти, преку лавиринт од жалби, преквалификации и нотарски изјави заврши со пресуда која докторот го враќа на работа.
Само пет одземени лиценци во период од 15 години
Во изминатите 15 години до Судот на честа при Лекарската комора биле поднесени осум пријави, а од нив за пет биле изречени дисциплински мерки. Изречените мерки се движат од поблаги казни како опомена, времено одземање на лиценца, па се до трајно одземање на лекарската лиценца. Според законските прописи постои и опција за јавна опомена на доктор, но досега таа не била изречена.
Според Законот за здравствена заштита трајно одземање на лиценца може да се изврши само доколку се донесе правосилна судска одлука. Во Македонија од 2010 до јуни 2025 година се одземени само пет лиценци.
Од 2022 до 2025 година до Лекарската комора биле поднесени вкупно 225 претставки од пациенти, членови на семејства на пациенти и институции.
