По повод вчерашниот текст со наслов Пандемско профитерство објавен на страницата на ИРЛ, болницата „Аџибадем Систина” испрати реакција во којашто бара да се извиниме и да ја објавиме реакцијата во целост, во спротивно ќе не тужи. Тие тврдат дека ги наоѓаат за неточни фактите изнесени во текстот, без притоа да ги посочат кои се неточните наоди. Во реакцијата на приватната болница, помеѓу другото, се вели следново:
„Можеме да заклучиме дека исклучително добро располагате со терминот ‘профитерство’ што ни дава за право за помислиме дека можеби тоа е и единствената ваша цел со овие постапки, а не би било ни малку зачудувачки со оглед на угледот во фелата и јавноста кој го имате, а е сличен на некои луѓе кои ги гледавме во блиското минато кои исто така тврдеа и се именуваа себеси како ‘истражувачки новинари’, па исто преку лажни лиценци од ‘Инсајдер’ најавуваа афери во продолженија“, пишува во дописот.
На реакцијата гледаме како на обид за заплашување и спречување на наше понатамошно истражување, со оглед на тоа што во истиот текст најавивме и второ продолжение, а компанијата инсистира да го избришеме текстот од нашата страница. ИРЛ укажува дека е наша должност и огромна обврска во време на пандемија да се известува за КОВИД-19. Тоа мора да можеме да продолжиме да го правиме безбедно и без притисоци кои имаат цел да ги замолчат критичните гласови во време на вонредна состојба.
Редакцијата на ИРЛ е отворена во секое време за цивилизиран разговор меѓу нашите новинари и вклучените страни во нашето известување за КОВИД – 19. За таа цел, добронамерно му посочуваме на менаџментот да обрне внимане на речникот што го користат одговорните во Службата за односи со јавност во „Аџибадем Систина“. Нивната задача носи и голема одговорност, бидејќи тие вербално ги комунуцираат пораките на компанијата со медиумите и со граѓаните. Ваква непримерна комуникација може погрешно да ја отслика деловната и општата култура во компанијата.
Ве покануваме да испратите демант во којшто аргументирано ќе ни ги посочите неточните работи во овој текст. Дописот којшто го добивме е наречен „Реакција“ и не оспорува факти, тврдења и изјави, туку прави обид да ја дискредитира редакцијата. Сторијата која што ја спорите е работена согласно сите врвни етички меѓународни стандарди по кои што нашата организација е препознаена. Во приказната ги имаме сите релевантни страни, вклучени се меѓународни експерти со име, презиме и видео линк, имаме потврда од официјална институција и изјава од министерот дека посочените тестови одговараат на описот во нашиот текст.
ИРЛ е препознаена по известување за организиран криминал и корупција, за што потврда се и нашите бројни меѓународни признанија. Ние сме и единствената организација посветена на тренинг преку работа на идните истражувачи во оваа земја и го прифативме предизвикот да инвестираме во младите. Во време кога новинарството се соочува со огромен недостаток од кадар на пазарот на труд, ваквите ситуации влијаат негативно на нашите обиди да ги охрабриме младите да продолжат да работат за јавниот интерес. Имајќи на ум дека вашата компанија вложува за да гради бренд на општествено одговорен чинител и учествува во хумани акции, очекуваме дека ќе го разберете значењето на поттикнувањето на културата на медиуми во државата.
Овој случај ИРЛ ќе го пријави во Здружението на новинари на Македонија, Самостојниот синдикат на новинари и медиумски работници и во Меѓународниот проект за известување за организиран криминал и корупција. За ситуацијата ќе ги известиме и клучните развојни партнери на Република Северна Македонија кои што ценат и поттикнуваат култура на почитување на фундамателните права и слободи и безбеден амбиент за работа на медиумите, особено во време на криза кога во речиси сите држави има ограничувања по слободата на медиумите. Во оваа нова и тешка реалност, не смееме да заборавиме дека улогата на медиумите е клучна, затоа што токму големите кризи можат да се претворат во можности на одредени интересни групи со моќ и ресурси.
На овој линк проследете избор од нашето известување за КОВИД – 19
ЦЕЛАТА РЕАКЦИЈА НА СИСТИНА ОВДЕ
Почитувани,
Во вчерашните наши одговори на прашањата кои што ни ги поставивте воедно апелиравме до вас и ве замоливме истите да бидат во целост објавени со цел да не изнесувате никакви шпекулации ниту да оставите простор истите да се шират. Целосно спротивно на тоа, во вашите приказни за ,,неетичко и несовесно’’ профитирање преку тестовите, со информациите и начинот на нивно тенденциозно пласирање единствен неетички и несовесен пристап е вашиот. Сите прашања, онолку колку што е потребно беа прецизно одговорени, а вие си дозволивте да дадете субјективно ,,експертско’’ гледиште на истите и како такви да ги пласирате како ,,истражувачки’’ информации во јавноста.
Во целиот текст објавен на порталот на ИРЛ со наслов: Пандемско профитерство или грижа за заедницата : Другата страна на приказната за КОВИД – 19 тестовите, на кој како автори се потпишани Сашка Цветковска, Маја Јовановска имате пласирано информации кои пред се целосно се неиздржани медицински, ниту се соодветно аргументирани, а најмалку од се претставуваат ваше релевантно истражување на темата.
Информациите со кои располагате во текстот, неколку бледи цитирања и неколку ,,потврди’’ од неименувани експерти ни посочува на тоа дека сте биле дел од оние, како што и вие тврдите во вашиот текст ,, Не многумина кои би го нашле и отвориле линкот, ниту пак, многумина имаат време и должност да исчитат толкав тест за самите да донесат заклучок’’ кои немале време да го отворат и прочитаат целото упатство кое е јавно достапно, а кое ги содржи деталите и референците за тестот. Можеби другите според вас немаат должност тоа да го направат, но на вас како новинари кои ,,посветено истражуваат’’ на оваа тема сметаме дека тоа требало да ви биде минимум одговорност и првиот чекор од истражувањето кој очигледно, според она кое го имате напишано, не го имате спроведено.
Можеме да заклучиме дека исклучително добро располагате со терминот ,, профитерство’’ што ни дава за право за помислиме дека можеби тоа е и единствената ваша цел со овие постапки, а не би било ни малку зачудувачки со оглед на угледот во фелата и јавноста кој го имате, а е сличен на некои луѓе кои ги гледавме во блиското минато кои исто така тврдеа и се именуваа себеси како ,, истражувачки новинари’’, па исто преку лажни лиценци од “Инсајдер” најавуваа афери во продолженија.
Во секој случај, целта на ова наше обраќање е далеку од тоа да го утврдиме вашиот кредибилитет како новинар туку да ви посочиме дека станува збор за ситуација во која на никаков основ не смее да се манипулира со јавноста. Веруваме дека ова треба да е и докажана пракса доколку навистина ги почитувате етичките принципи на новинарството.
Во насока на тоа да почнете транспаретно да известувате и да не ширите невистини, односно да не вршите манипулација на јавноста во ваша корист, иако веќе требаше да ги имате овие информации како дел од вашето експертско истражување ние повторно ќе ви посочиме.
Во самото интро на текстот, во почетокот на истиот изнесувате невистина во однос на она што како резултат го даваат тестовите во Аџибадем Систина и што е она што тие го детектираат. Овие IgG- IgM Rapid Test – серумски тестови кои се набавени од холандска фирма се користат за масовен скрининг на населението, нешто што е една од клучните препораки на здравствените организации со цел рана детекција на вирусот кај населението и спречување на неговото ширење. Овој тип на тестови активно се користат во САД, Велика Британија, Италија, Норвешка, Канада, Шпанија, Нов Зеланд, Брунеи, Обединети Арапски Емирати,Индонезија, Бразил и Романија. Со овој тип на тестови, како единствено разумно моментално решение бидејќи како и сите земји зафатени од пандемијата е во трка со времето започнаа и Бугарија и Србија. Во однос на вашето тврдење од неименувани експерти дека точноста и намената на овие тестови се манипулативни ве информираме дека FDA (Food and drug administration) која е федерална агенција на американскиот стејт департмент за здравје и човечки услуги ги одобри овие брзи тестови сигнализирајќи дека федералните регулатори се целосно задоволни со податоците за валидација на тестот и веруваат дека придобивките на истиот ги надминува сите ризици, како што се лажно позитивните или лажно негативните резултати.
Серумските тестови кои ги користи Аџибадем Систина го утврдуваат присуството на две антитела, IgG кое што покажува дека пациентот бил во контакт со вирусот, веќе изградил имунитет и не е повеќе заболен и IgM што укажува дека пациентот е инфициран и заразен од вирусот Ковид -19.
Како што и наведовме во нашите одговори, процедурата во однос на тоа ако се добие позитивен резултат за пациентот како кај клиниката Жан Митрев и Биотек лабораторијата е иста, КБ Аџибадем Систина веднаш го пријавува пациентот во Институтот за јавно здравје каде што тестот треба да биде потврден. Нашата информација од Министерството за здравство е дека по утврдување на 10 позитивни резултати кои ќе се потврдат и во ИЈЗ потоа се препраќаат само имињата на позитивните пациенти и не мора да се повторува тестот бидејќи резултатите веќе се сметаат за референтни. За ваше информирање денеска Комисијата од Министерство за здравство ги потврди 3 случаи кои веа потврдени на тестот за Ковид 19 во Аџибадем Систина.
Покрај овие серумски тестови, Клиничката болница Аџибадем Систина го работи и молекуларниот тест ViroReal Kit SARS- CoV-2 & SARS кој чини многу повеќе ( 3000 денари, но сепак поевтино отколку државниот) и кој не го рекламиравме, а се користи за клиничка употреба во болницата, односно, за тестирање на пациенти кои се третираат во болницата, а се суспектни на вирусот Ковид-1. Клиничката болница Аџибадем Систина од 2010 години има регистрирано лабораторија за молекуларна биологија во која активно работат 6 молекуларни биолози.
Во истата насока, референците и цената на тестот кој го изведува Аџибадем Систина беа транспарентно објавени во сите медиуми, а во тоа соопштение никаде од наша страна не беше директно наведено дека тестот е поевтин од другите клиники и дека немало да се спроведуваат неетичките пракси на Клиниката Жан Митрев, нешто кое вие го наведувате. Име или активност на било која друга клиника која врши тестирање не беше посечено во нашето соопштение.
Вашиот текст се базира на злоупотреба и манипулација на информациите кои ви беа достапни, а кои дел веројатно не ги ни прочитавте, што е далеку од професионално особено за новинари кои сакаат да се декларираат како ,,истражувачки’’. Во вашиот ,,истражувачки текст ‘’ и оној кој е најмалку упатен лесно ќе ги почувствува очајничките обиди да направите сензационален театар за јавноста. Со оглед на тоа дека не располагате со никакви информации за тоа како и колку се набавени овие тестови, а бидејќи за истите не е извршена јавна набавка не постои ни простор да ви се реферира околу истото сметаме дека се целосно непримерни вашите коментари дека се дозволува злоупотреба врз населението во име на профитот. Ќе ви повториме уште еднаш дека навистина добро располагате со овој термин, но и ќе ве потсетиме дека дури и доколку тоа се вашите цели не секогаш треба неиздржано да го манипулирате во јавноста.
Пред да ја утврдите вашата одговорност во однос на текстот во кој покрај невистинити информации и клевети кои ги изнесувате во јавноста, а истите и директно ги упатувате до нас со што покрај залажување на населението вршите и навреда и наштетувате на нашиот углед Ве известуваме дека согласно член 8 став 1 од законот за граѓанска одговорност за навреда и клевета (Службен весник на РМ бр. 143/2012) „за клевета одговара тој што за друго лице со утврден или очевиден индентитет, со намера да наштети на неговата чест и углед, пред трето лице изнесува или пренесува невистинити факти што се штетни за неговата чест и углед,…„ Согласно став 2 од истиот член „Одговорност за клевета постои и ако невистинитото тврдење содржи факти штетни за угледот на правно лице…„
Во таа смисла бараме согласно член 13 став 1 од законот за граѓанска одговорност за навреда и клевета да се извините за изнесените невистини, клевети и навреди и јавно да го повлечете натписот. Бараме извинувањето и повлекувањето да го објавите на исто место и на ист начин. Во спротивно ќе поднесеме тужба за клевета против вас и вашиот медиум.
