Обвинителството ќе ја вештачи викендичката на Попова Шапка во сопственост на универзитетскиот профeсор од Државниот тетовски универзитет Фатон Мурсели за да утврди кога точно била изградена. Семејството кое обвинува дека плацот им е узурпиран, достави докази за платени придонеси за изградба на викендичка уште од времето на Југославија.
Известува: Иван Блажевски
Во осумдесеттите години на минатиот век секој кој сакал да гради викендичка на Попова Шапка требало да плати давачки кон државата. Се плаќало за уредување на инфраструктурата и придонес за изградба на викенд-куќа. Тогашната социјалистичка држава плацовите им ги продавала на заинтересирани граѓани за да се изградат викендички на сончевите падини на Шара.
Нови документи до кои дојде Истражувачката репортерска лабораторија (ИРЛ) укажуваат дека токму кон крајот на осумдесеттите години друго лице купило плац и платило комунални давачки за да изгради куќа каде денес се наоѓа легализираната дивоизградена викендичка на угледниот професор на Државниот тетовски универзитет (ДУТ) Фатон Мурсели. Полицијата и Основното јавно обвинителство (ОЈО) веќе водат процес за случајот.
Во март годинава објавивме сторија како Муамет Бејтулахи (61), кој тврди дека е сопственик на плацот, поставил темели за викенд-куќа, но никогаш не ја доизградил затоа што се иселил од државава.
Бејтулахи е роден во тетовското село Челопек, но со децении живее во Војводина (Србија). Во тетовската полиција лани пријавил дека некој му го узурпирал плацот и на него гради куќа.
„Муамет летово најде стари документи и фотографии од минатото. Успеа да ‘ископа’ и уплатници… Со овие докази покажува дека плацот е негов и оти си ги подмирувал обврските кон државата“, појасни за ИРЛ Горан Илиев, адвокат на Бејтулахи.
ИРЛ откри дека на плацот пред само две години нелегално била изградена нова куќа. Општинската администрација во Тетово ја легализирала преку фалсификуван геодетски елаборат и лажна изјава на барателот на легализацијата дека на местото наводно имало куќа пред 2011 година.
За воопшто да може да се спроведе постапка за легализација согласно Законот, барателите мораа да поднесат доказ (сметки за струја, вода и слично) или изјава заверена на нотар дека на некое место имаат функционален нелегален објект изграден пред 2011 година.
Но, наместо Бејтулахи, во блокот Г во викенд-населбата куќа сега поседува професорот Мурсели.
„Муамет Бејтулахи си го бара своето. Да му се врати истото што го имал, односно изградени темели до плоча. Тоа може да се случи само ако се урне сегашната куќа“, вели адвокатот Илиев.
Уплатници од 1987 и 1989 година
Како што ИРЛ објави во првото истражување, сѐ започнало во 1987 година, кога Муамет Бејтулахи купил државен плац за викендичка на Шапка. Тетовска фирма му изработила градежен проект, но тој никогаш не ја изградил затоа што Социјалистичка Федеративна Република Југославија (СФРЈ) се распадна и следуваа години на војни и транзиција.
Но, три децении подоцна, кон крајот на август 2024 година, додека бил во земјава, Муамет видел дека на неговиот плац некој друг гради куќа и пријавил во тетовската полиција.
Повеќе од една година тој води правна битка преку МВР и Обвинителството за да докаже дека дивоизградениот, па легализиран објект кој сега му припаѓа на универзитетскиот професор Мурсели, бил изграден преку узурпација на неговиот плац.
Во доказите што деновиве во ОЈО во Тетово ги достави неговиот адвокат се наоѓаат повеќе документи од времето на СФРЈ. Преку нив Бејтулахи сака да докаже дека самиот тој веќе платил комунален придонес за изградба на викендичка на плацот, а ги подмирил и обврските за инфраструктурата на Шапка.
Уплатници од 1987 и 1989 година: Комунален придонес за изградба на викендичка на име Муамет Бејтулахи, за осветлување во Попова Шапка и за асфалтирање. ФОТО: Архива на семејството Бејтулахи.
Станува збор за уплатница од 1987 година со која Муамет Бејтулахи платил 214.240 тогашни динари во име на комунален придонес за – како што е наведено – изградба на викенд-куќа, изработка на протокол, извод и исколчување.
Освен тоа, до Обвинителството е доставена и уплатница од истата година во која може да се види дека Бејтулахи платил 50.000 динари за асфалтирање на улиците на Попова Шапка, како и уплатница од 1989 година во висина од 150.000 динари за изградба на осветлување во викенд-населбата.
Ќе се вештачи кога била изградена куќата на професорот Мурсели
Помина повеќе од половина година откако ИРЛ ја објави првата сторија за случајот. Од ОЈО велат дека активно собираат информации, а периодов ќе нарачаат да се направи и експертиза на куќата на универзитетскиот професор Фатон Мурсели за да се утврди кога точно била изградена.
„Обвинителството презема дејствија, односно веќе се сослушани повеќе сведоци, а ќе се сослушаат и други. Ќе се нарача и вештачење на вградените материјали во куќата што сега постои на плацот за точно да се утврди колку е стара. Потоа ќе следуваат други правни дејствија“, соопштија за ИРЛ од ОЈО.
Од МВР нѐ информираа дека СВР Тетово до Обвинителството доставило поднесок за случајот и во него се споменуваат сите инволвирани лица во кривичното дело кое во полицијата го водат како „самовластие“.
Но, адвокатот на Муамет Бејтулахи се сомнева дека во тетовската полиција постои тенденција истрагата намерно да се пренасочува кон делото „самовластие“ кое се гони со приватна тужба и носи поблаги казни.
Спротивно на тоа, потенцијалните кривични дела во овој случај како што се „узурпација“, „злоупотреба на службената положба“ или „бесправно градење“, државата треба да ги гони по службена должност и носат построги казни за сторителите.
„Затоа поднесовме барање за внатрешна контрола во МВР бидејќи сметаме дека во тетовската полиција некој некого штити“, изјави адвокатот Горан Илиев за ИРЛ.
Во меѓувреме, поради неправилности при надзорот над дивоградбата на Шапка, во Општина Тетово беше покрената дисциплинска постапка против главниот општински градежен инспектор, Гзим Ганиу.
Ганиу изготви неколку различни извештаи од инспекцискиот надзор над дивоградбата откако ИРЛ врз основа на Законот за слободен пристап до информации од јавен карактер побара копија од извештајот за спроведениот надзор. Во документот забележавме и оти професорот Фатон Мурсели воопшто не се појавил во инспекцијата на денот кога бил повикан.
Но, постапката за утврдување дисциплинска одговорност на инспекторот Ганиу е стопирана поради локалните избори чиј прв круг треба да се одржи на 19 октомври.
„Постапката ќе продолжи по завршувањето на изборниот процес и по создавањето услови за непречено работење на Дисциплинската комисија“, соопштија од Општина Тетово за ИРЛ.
Инаку, по објавувањето на сторијата, Ганиу во мај бил привремено преместен од функцијата раководител на инспекциски надзор и назначен за шеф на одделението за животна средина. Но, се жалел, па со одлука на градоначалникот Биљал Касами, повторно бил вратен на старото работно место.
Геодетската фирма остана без лиценца
Освен неправилности при општинската градежна инспекција над дивоградбата на Шапка, ИРЛ откри дека процесот за легализација на новоизградениот објект бил спроведен со незаконски геодетски елаборат кого го изготвила тетовската геодетска фирма „Геополог“, а го потпишал нејзиниот управител Ајдин Нуредини.
По неколку месеци Агенцијата за катастар им ги одзеде лиценците за работа на „Геополог“ и Нуредини, а решенијата за одземање на овластувањата се однесуваат на друг случај. Сепак, од Катастарот потврдија за ИРЛ дека и во постапката за легализација на куќата на Шапка имало сериозни неправилности.
Во елаборатот што го доставил „Геополог“ недостасуваа датум и време на дигиталниот потпис на Нуредини. Документот, според тврдењата на геодетската фирма, бил изготвен во 2017 година, но Катастарот утврди дека електронскиот потпис на Нуредини не е валиден и оти дента кога наводно мереле дивоградба на Шапка, всушност мереле во градот Тетово.
ИРЛ откри дека професорот од ДУТ, Фатон Мурсели, во 2024 година модерно изградената викендичка ја добил како подарок. Му ја дал роднина (Сали Исени) преку кого всушност течела постапката за легализација и кој во процесот поднел изјава дека куќата била изградена пред 2011 година.
Но, според видео и сателитски снимки до кои дојде ИРЛ, на тоа место до 2024 година немало куќа, туку само темелите за кои Муамет Бејтулахи вели дека ги изградил кон крајот на ‘80-ттите години.
ИРЛ во неколку наврати во текот на истражувањето му нудеше на Мурсели пред камера и на писмено да го каже неговиот став во однос на случајот, но тој не прифати. Наместо тоа, ни се закани дека ако во јавноста излезе сторија со неговото име ќе ни поднесе кривична пријава.
