Незаконската изградба на викендичката на Попова Шапка на професорот Фатон Мурсели од Тетовскиот државен универзитет сега ја истражува одделението за економски криминал во МВР. Тој до полицијата доставил дополнителни документи кои на инспекторите им биле сомнителни. Без лиценца остана фирмата на геодетот кој му изработи лажен елаборат. Во меѓувреме професорот Мурсели од Општина Тетово доби одобрение да гради зграда каде тој е еден од инвеститорите.
Известува: Иван Блажевски
Агенцијата за катастар им ги одзема овластувањата за работа на геодетската компанија „Геополог“ од Тетово и на нејзиниот управител Ајдин Нуредини кои изработија незаконски геодетски елаборат за легализација на дивоизградена куќа на Попова Шапка на професорот од Државниот тетовски универзитет (ДУТ), Фатон Мурсели.
На случајот за кој ИРЛ во неколку наврати известуваше од почетокот на годинава работат полицијата и Обвинителството, додека во Општина Тетово започна дисциплинска постапка против главниот градежен инспектор Гзим Ганиу поради неправилности во постапката за легализација.
„Ве известуваме дека по спроведена постапка од страна на Агенцијата за катастар на недвижности се донесени Решение за одземање на овластувањата на лицето Ајдин Нуредини и решение за одземање на лиценцата на трговското друштво за геодетски работи „Геополог“ – Тетово,“ информираа за ИРЛ од Агенцијата за катастар во Скопје.
Оттаму сепак, наведоа дека донесените решенија за одземање на лиценцата и овластување се за друг елаборат изработен од истата геодетска фирма затоа што случајот со дивоградбата на Шапка веќе бил застарен.
Кон крајот на март, Агенцијата за катастар ги потврди откритијата на ИРЛ, според кои во постапката за легализација на објектот на Попова Шапка имало незаконитости.
ИРЛ утврди дека во геодетскиот елаборат, кој бил дел од потребната документација за легализација, недостасувал датум и време на дигиталниот потпис на Ајдин Нуредини – управител на „Геополог“. Овој документ, наводно, бил изготвен од неговата фирма во 2017 година.
Но, по проверката во сопствениот систем, од Катастарот за ИРЛ изјавија дека електронскиот потпис на документот не е валиден.
Дополнително, во истиот елаборат беше пронајдена страница што наликува на оригинален податок од теренско мерење. Сепак, не беше приложен електронски доказ дека геодети од „Геополог“ на 22 септември 2017 година навистина биле на Шапка и ја измериле куќата за која лицето Сали Исени поднел барање за легализација. Спротивно на тоа, во елаборатот стои дека тогаш на парцелата имало објект со површина од 132 квадратни метри.
Меѓутоа, катастарската служба потврди дека нивната евиденција не покажува никакви теренски мерења на „Геоплог“ тој ден во Шапка, иако Нуредини изјави за ИРЛ дека геодети биле во ски-центарот.
Истражувањето започна кога ИРЛ откри дека професорот од Катедрата по социологија на Филозофскиот факултет во ДУТ, Фатон Мурсели, во 2024 година станал сопственик на модерна викендичка на Попова Шапка, добиена како подарок. Процедурата за легализација била започната уште во 2016 година од страна на Сали Исени, роднина на Мурсели од селото Нераште, кој тогаш поднел барање и со нотарска изјава потврдил дека објектот бил изграден пред 2011 година – клучен услов во Законот за легализација на дивоградби со кој само објекти подигнати пред 2011 можат да се легализираат.
Меѓутоа, ИРЛ утврди дека до 2024 година на тој плац немало никаков објект, а тоа го потврдуваат и сателитските снимки од локацијата на „Google“ . Истражувањето откри сериозни злоупотреби – неточен геодетски елаборат, фалсификуван извештај од инспекциски надзор и известување од МВР во кое се наведува дека Фатон Мурсели е потенцијален извршител на кривично дело „самовластие’.
Му отвораат дисциплинска постапка, но повторно го ставаат за шеф на инспекцијата
Како резултат на истражувачката сторија, Општина Тетово покрена дисциплинска постапка против шефот на општинската градежна инспекција Гзим Ганиу. Но, како што нѐ информираа од Општината , во моментов тој користи боледување, па ќе одел на годишен одмор.
„Поради тоа дисциплинската комисија сѐ уште нема одржано седница за разгледување на конкретниот случај бидејќи присуството на вработениот е неопходно согласно Законот за административни службеници“, наведоа од Општина Тетово.
Откако инспекторот ќе се врати од одмор, дисциплинската комисија ќе одржела седница.
Во меѓувреме, ИРЛ откри дека Ганиу привремено бил сменет од функцијата раководител на одделението за инспекциски надзор и на 5 мај поставен за шеф на одделението за животна средина. Но, тој се жалел и по само еден месец градоначалникот Биљал Касами потпишал решение со кое Ганиу повторно бил вратен на истата позиција – Раководител на одделението за инспекциски надзор од урбанистичка и градежна област.
„Во однос на прашањето за привременото распоредување на вработениот на друго работно место, Ве информираме дека секоја таква промена се спроведува со посебен административен акт и е во рамки на законските надлежности на градоначалникот на Општината“, соопштија за ИРЛ од Општината.
До дисциплинска постапка против Ганиу дојде откако документите од инспекцијата кај дивоградбата на Мурсели на Попова Шапка кои ИРЛ ги доби во Општина Тетово беа различни и коригирани. Во еден од нив инспекцискиот надзор беше заведен како „редовен“, а во друг стоеше зборот „вонреден“.
Постоеја разлики во одговорите на прашањата дали се евидентирани неправилности. Во една од верзиите стоеше дека „се забележани неправилности“, додека во друга се тврдеше дека „не се утврдени никакви неправилности“.
Инспекцискиот надзор се разликуваше помеѓу македонската и албанската верзија на извештајот, а беа присутни дури три различни варијанти на тој податок.
Инаку, инспекторот навел дека инвеститорот Фатон Мурсели изградил викенд-куќа, градежните активности биле во финална фаза и оти се работело на надворешната фасада кога исконтролирале дали некој гради бесправно на државна земја на Попова Шапка.
На професорот му била испратена покана да се јави во општинската градежна инспекција на 10 септември 2024 година и да достави техничка документација за викендичката. Сепак, тој не се појавил во тој ден, туку многу подоцна.
Во вториот инспекциски извештај што ИРЛ го доби од Општина Тетово не беше наведено дека има исправки, иако содржината беше различна.
Случајот префрлен во отсекот на МВР за економски криминал
Од МВР за случајот со дивоградбата на професорот ни одговорија дека е преселен во секторот за економски криминал во МВР.
Нѐ информираа дека на 13 февруари годинава Мурсели до полицијата на Попова Шапка доставил дополнителни документи кои според полициските службеници „биле сомнителни“. Поради тоа на 17 март полицајци се консултирале со Јавното обвинителство во Тетово. Било одлучено целиот предмет да биде предаден на Одделение за криминалистичка полиција Тетово за понатамошно постапување и обезбедување на докази.
„По ова, наведениот предмет е задолжен во Одделение за криминалистичка полиција – Отсек за економски криминалитет при СВР Тетово и од страна на полициски службеници во континуитет се преземаат истражни дејствија со цел обезбедување на материјални докази, а по завршената постапка ќе биде процесуиран соодветен поднесок до ОЈО Тетово“, нѐ информираа од МВР.
Но, од Обвинителството нагласуваат дека до овој момент до Основното јавно обвинителство Тетово не е доставена кривична пријава.
„По однос на легализацијата на објектот надлежниот јавен обвинител постапува по поднесено известување, врз основа на кое обвинителот издаде наредби за прибирање одредени докази и документација во предистражна постапка“, додадоа од Обвинителството во одговорот до ИРЛ.
Од Државниот управен инспекторат пак, ни кажаа дека добиле барање од МВР со кое се побарани податоци за извршените инспекциски надзори во Општина Тетово, а кои се однесуваат за изградената викендица и тие биле доставени.
„Поради новонастанатите околности не сме во можност да дадеме дополнителни информации на Вашите прашања заради постоење на можноста да се изнесат факти и докази кои би влијаеле или би можеле да влијаат на текот на постапката која се води пред надлежен орган“, соопштија за ИРЛ од Инспекторатот.
Мурсели почнаа да градат зграда во Тетово
Освен викендичка на Попова Шапка, професорот Фатон Мурсели во 2024 година добил уште еден вреден подарок. На 14 февруари лани со договор за дар станал сопственик на една четвртина од парцела во урбаниот блок 74 во Тетово.
Се наоѓа меѓу две постари згради, а во близина има подземни гаражи и засолниште.
Во мај годинава општина Тетово за таа парцела издала одобрение за градење на станбена зграда – подрум, приземје, четри ката и поткровје. Меѓу петте инвеститори е и професорот Фатон Мурсели, кој на крајот треба да добие стан од 72 квадрати и гаража од 14 квадрати. Заедно со него ко-инвеститори се тројца негови роднини и фирма од Желино.
Градењето беше овозможено откако општина Тетово на 22 октомври 2024 донела конечен предлог-план за измена и дополнување на Деталниот урбанистички план (ДУП) за дел од урбаниот блок 74, а бил опфатен и овој плац.
Сопругата на професорот, Ревиде Рамани Мурсели, е претседателка на Комисијата за урбанизам, тело задолжено да ги врши стручните работи во постапката за изработување и донесување урбанистички планови.
Уште во 2017 година тогашната градоначалничка Теута Арифи од Демократската унија за интеграција (ДУИ) започнала со процедурата за измена и дополнување на ДУП – от за урбаниот блок 74. Но, Општина Тетово дури во октомври 2024 година го донела конечниот предлог-план за периодот 2017-2027 година.
„Тој предмет јас го најдов во финална фаза. Јас сум потпишана во финална фаза, значи, после сите филтри што ги поминал планот“, ни изјави пролетва Рамани Мурсели откако ја прашавме дали има судир на интерес што таа како раковидителка на Комисијата за урбанизам во општина Тетово е потпишана на документ кој овозможува изградба на зграда на парцела која делумно е во сопственост на нејзиниот сопруг.
